Border News Agency
ဆိုးလ်၊ အောက်တိုဘာ ၃၀။
တရုတ်ဟာ မြန်မာ့ဒီမိုကရေစီကိုအားပေးထောက်ခံရမယ့်အစား စီးပွားရေးနဲ့နိုင်ငံရေးအရလွမ်းမိုးမှုကိုသာလုပ်နေပြီး မြန်မာစစ်တပ်ကို နိုင်ငံတကာအရေးယူခံရမှုကကာကွယ်နေတယ်လို့ Fortify Rights က ဆိုပါတယ်။
ခုရက်သတ္တပတ်နောက်ဆုံး ဆိုးလ်မှာကျင်းပမယ့် အေပက်(APEC)အာရှ- ပစိဖိတ်စီးပွားရေး ပူးပေါင်းဆောင်ရွက်မှုအစည်းအဝေးမှာ အမေရိကန်သမ္မတထရန့်ဟာ တရုတ်သမ္မတအပါအဝင် အာရှခေါင်းဆောင်တွေကို လူ့အခွင့်အရေးနဲ့ပတ်သက်ပြီး ဖိအားပေးသင့်တယ်လို့ Fortify Rights (အခွင့်အရေးခံတပ်)အဖွဲ့က အောက်တိုဘာလ ၂၉ ရက်နေ့ ထုတ်ပြန်ပါတယ်။
တရုတ်ပြည်ထဲက ဝီဂါမူဆလင်၊ တိဘက်ဗုဒ္ဓဘာသာ၊ ခရစ်ယာန်၊ ဟောင်ကောင်နဲ့တိုင်းပြည်တနံတလျားတလျှောက် ဖိနှိပ်နေတာတွေကို ရပ်တန့်ဖို့အတွက် သမ္မတထရန့်ဟာ ရှီကျင့်ပင်ကို ဖိအားပေးဖို့လိုပါတယ်။
တရုတ်ဟာ မြောက်ကိုးရီးယားက ထွက်ပြေးလာသူတွေကိုလည်း ပြန့်ပို့နေတယ်။ ပြီးရင် စစ်ရာဇဝတ်မှု၊ လူသားမျိုးနွယ်အပေါ်အကြမ်းဖက်မှု၊ လူမျိုးတုံးသတ်ဖြတ်မှုတွေ ကျူးလွန်နေတဲ့မြန်မာ့စစ်တပ်ကိုလည်း ထောက်ပံပေးနေပါတယ်။
အဲဒါတွေကိုရပ်တန့်ဖို့အတွက် သမ္မတထရန့်ဟာ အမေရိကန်ရဲ့နိုင်ငံရေးနဲ့ စီးပွားရေးဩဇာကိုသုံးပြီး ရှီကျင်ပင်ကို ဖိအားပေးသင့်တယ်လို့ Fortify Rights ရဲ့အကြီးတန်းဒါရိုက်တာဘင်နီဒခ်(တ်) ရော်ဂျာစ်ကဆိုပါတယ်။
မြန်မာလူထုဟာ ၂၀၂၁ခုနှစ် စစ်တပ်ကအာဏာသိမ်းယူပြီးနောက်မှာ လူ့အခွင့်အရေးအခြေအနေတွေ ဆိုးဝါးနေပြီး လူသားချင်းစာနာမှုအကူအညီတွေကို လိုအပ်နေပါတယ်။
ရာဇဝတ်မှုတွေကျူးလွန်ထားတဲ့ ဗိုလ်ချုပ်မှူးကြီးမင်းအောင်လှိုင်အပါအဝင် စစ်ဘက်ခေါင်းဆောင်တွေဟာ အရေးယူခံရမှုကလွတ်ကင်းနေဆဲပါ။
တရုတ်ဟာ မြန်မာ့ဒီမိုကရေစီကို အားပေးထောက်ခံရမယ့်အစား စီးပွားရေးနဲ့ နိုင်ငံရေးအရ လွမ်းမိုးမှုကိုသာလုပ်နေပြီး မြန်မာစစ်တပ်ကို နိုင်ငံတကာအရေးယူခံရမှုက ကာကွယ်နေတယ်လို့ Fortify Rights က ဆိုပါတယ်။
သမ္မတထရန့်က ဟောင်ကောင်ဒီမိုကရေစီအရေးထောက်ခံသူ ဂျင်မီလှိုင်လွတ်မြောက်ရေးအတွက် ရှီကျင်ပင်ကို ဖိအားပေးမယ်လို့ ပြောဖူးပါတယ်။
ပြီးခဲ့တဲ့ရက်သတ္တပတ်က အမေရိကန်အထက်လွတ်တော်အမတ် ၃၀ ဦးက ထရန့်အပေါ် ဂျင်မီလှိုင်ကိစ္စဆောင်ရွက်ဖို့အတွက် စာရေးတောင်းဆိုထားပါတယ်။
ထရန့်ဟာ ဇီယွန်းဘုရားကျောင်းနဲ့ပတ်သတ်တဲ့ တရားဟောဆရာအီဇ်ရာဂျင်မင်ဂရီနဲ့ ခရစ်ယာန် ၃၀ ဦးကို ပြီးခဲ့တဲ့လက တရုတ်အစိုးရဖမ်းထားတာကိုလည်း ဖိအားပေးသင့်တယ်လို့ Fortify Rights က ဆိုပါတယ်။
မြန်မာလူထုဟာ သူတို့ရဲ့နိုင်ငံရေးကံကြမ္မာကို ဆုံးဖြတ်နိုင်အောင် သမ္မတထရန့်အနေနဲ့ အမေရိကန်ရဲ့ဩဇာအာဏာကိုသုံးပြီး အကူအညီပေးသင့်တယ်လို့လည်း Fortify Rights က ဆိုပါတယ်။
အာရှရဲ့ဒီမိုကရေစီနိုင်ငံတွေဖြစ်တဲ့ဂျပန်နဲ့ တောင်ကိုးရီးယားဟာ မြန်မာ၊ တရုတ်၊ မြောက်ကိုးရီးယားနဲ့အာရှအာဏာရှင်တွေကို ဖိအားပေးရာမှာပိုပြီးအသံထွက်လာဖို့ကိုလည်း သမ္မထရန့်က တိုက်တွန်းသင့်ပါတယ်။
အေပက်ဟာမူလက စီးပွားရေးဆိုင်ရာ နိုင်ငံတကာပူးပေါင်းဆောင်ရွက်မှုဆိုပေမယ့် လူ့အခွင့်အရေးကို မျက်ကွယ်ပြုထားလို့မရပါဘူး။
စီးပွားရေးရေရှည်တည်တံဖို့အတွက်ကို လူ့အခွင့်အရေးလိုတယ်လို့ ဘင်နီဒခ် (တ်)ရော်ဂျာစ်က ပြောပါတယ်။
Sources
