Border News Agency
နေပြည်တော်၊ နိုဝင်ဘာလ ၁၇။
မြန်မာနိုင်ငံတဝှမ်းမှာ စစ်ရေးပဋိပက္ခတွေ၊ ပြင်းထန်တဲ့ သဘာဝဘေးအန္တရာယ်တွေကြောင့် ပြည်သူသုံးဒသမခြောက်သန်းဟာ လူသားချင်းစာနာထောက်ထားမှုဆိုင်ရာ အကူအညီပြတ်လပ်မှုနဲ့ရင်ဆိုင်နေရတယ်လို့ ကုလသမဂ္ဂလူသားချင်းစာနာမှုဆိုင်ရာပူးပေါင်းညှိနှိုင်းရေးရုံး(UNOCHA)က နိုဝင်ဘာလ ၁၇ ရက်၊ ဒီနေ့ထုတ်ပြန်ပါတယ်။
နိုင်ငံတဝှမ်းရှိပြည်နယ်နဲ့ တိုင်းဒေသကြီးအများအပြားမှာ စစ်ကော်မရှင်တပ်နဲ့ လက်နက်ကိုင်အဖွဲ့အမျိုးမျိုးတွေကြား ပဋိပက္ခတွေဆက်လက်ဖြစ်ပွားနေလို့ အရပ်သားထိခိုက်မှုနှုန်းမှာမြင့်မားနေဆဲဖြစ်တယ်လို့ဆိုပါတယ်။
လက်နက်ကြီးပစ်ခတ်မှုတွေနဲ့တိုက်ပွဲတွေ နေ့စဉ်ဖြစ်ပွားနေတာဟာလည်း အခြေအနေကိုပိုမိုဆိုးရွားစေတယ်လို့ ဆိုပါတယ်။
နိုင်ငံတဝှမ်းပြည်တွင်းနေရပ်စွန့်ခွာတိမ်းရှောင်သူ၂၀၂၅ ခုနှစ်၊ နိုဝင်ဘာလထိ (IDP) စုစုပေါင်း သုံးဒသမခြောက်သန်း ထိရှိမယ်လို့လည်းဆိုပါတယ်။
ပြီးခဲ့တဲ့အောက်တိုဘာလကစလို့ တိုက်ပွဲတွေကြောင့် ထောင်နဲ့ချီတဲ့မိသားစုတွေဟာ နေအိမ်တွေကိုစွန့်ခွာတိမ်းရှောင်ခဲ့ကြရပြီး အစားအသောက်၊ အမိုးအကာနဲ့ကျန်းမာရေးစောင့်ရှောက်မှုဆိုင်ရာ အရေးပေါ်လိုအပ်ချက်တွေ တိုးမြင့်လာခဲ့တယ်လို့လည်းဆိုပါတယ်။
ကမ္ဘာ့စားနပ်ရိက္ခာဖူလုံရေးစောင့်ကြည့်မှုအရ မြန်မာနိုင်ငံဟာ ကမ္ဘာပေါ်မှာစားနပ်ရိက္ခာမလုံလောက်မှု အမြင့်မားဆုံးစိုးရိမ်ဖွယ်ရာနေရာ စာရင်းမှာပါဝင်နေဆဲဖြစ်တယ်လို့လည်း ဆိုပါတယ်။
ရခိုင်၊ မောင်တောနဲ့ ဘူးသီးတောင်မြို့နယ်တွေမှာ အာဟာရပြည့်ဝမှုဆိုင်ရာ အခြေအနေတွေဟာ လျင်မြန်စွာဆုတ်ယုတ် ကျဆင်းလာနိုင်ဖွယ်ရှိတယ်လို့လည်း ခန့်မှန်းထားပါတယ်။
အဲဒီဒေသကထိခိုက်လွယ်တဲ့ လူမှုအသိုက်အဝန်းတွေအတွက် အရေးပေါ် အာဟာရအကူအညီတွေလိုအပ်နေတယ်လို့လည်း ဆိုပါတယ်။
အဲဒီအပြင်မြေမြှုပ်မိုင်းတွေနဲ့ ပေါက်ကွဲစေတတ်တဲ့ လက်နက်ခဲယမ်းတွေအန္တရာယ်နဲ့ပတ်သက်တဲ့ အချက်အလက်သစ်တွေအရ မြန်မာနိုင်ငံမှာအရပ်သားနှစ်ဦး နေ့စဉ် ပျမ်းမျှထိခိုက်ဒဏ်ရာရရှိနေတယ်လို့လည်း ဆိုပါတယ်။
အဲဒီအခြေအနေဟာ အသက်ကယ်ဆယ်ရေးဆိုင်ရာ အန္တရာယ်ကြိုတင်ကာကွယ်ရေးအသိပညာပေးလုပ်ငန်းတွေနဲ့ မိုင်းရှင်းလင်းရေးလုပ်ငန်းတွေ အရှိန်အဟုန်မြှင့်တင်ဖို့ အရေးတကြီးလိုအပ်နေတယ်လို့လည်းဆိုပါတယ်။
၂၀၂၅ ခုနှစ် လူသားချင်းစာနာမှုဆိုင်ရာ လိုအပ်ချက်တွေနဲ့တုံ့ပြန်ရေးအစီအစဉ်အတွက် လိုအပ်တဲ့ရန်ပုံငွေရဲ့ဆယ့်ငါးရာခိုင်နှုန်းကိုသာ ရရှိထားဆဲဖြစ်တယ်လို့လည်းဆိုပါတယ်။
အဲဒီလို ရန်ပုံငွေဆိုးရွားစွာမလုံလောက်မှုဟာ ဒုက္ခရောက်နေတဲ့ပြည်သူသန်းပေါင်းများစွာရဲ့ လူမှုဘ၀ရှင်သန်ရေးအတွက် မရှိမဖြစ်လိုအပ်တဲ့အကူအညီပေးအပ်ရေးကို အကြီးအကျယ်ခက်ခဲစေပြီး အရေးပေါ်အကူအညီတုံ့ပြန်မှုလုပ်ငန်းတွေ ရပ်တန့်လုနီးပါးအခြေအနေသို့ ရောက်ရှိနေတယ်လို့ဆိုပါတယ်။
