Border News Agency
မြောက်ဦး၊ ဒီဇင်ဘာ ၁၄။
အာရက္ခတပ်တော်(AA)ထိန်းချုပ်ထားတဲ့ မြောက်ဦးမြို့ရှိ မြောက်ဦးပြည်သူ့ဆေးရုံကြီးကို ဒီဇင်ဘာလ ၁၀ ရက်နေ့၊ ည ၉နာရီကျော်အချိန်က စစ်ကော်မရှင်တပ်လေကြောင်းတိုက်ခိုက်လို့ အရပ်သားသုံးဆယ်သုံးဦးသေဆုံးပြီး ခုနှစ်ဆယ်ခုနှစ်ဦးဒဏ်ရာရသွားခဲ့ပါတယ်။
အဲဒီထဲမှာ အမျိုးသမီးဆယ့်ခုနှစ်ဦးသေဆုံးပြီး လေးဆယ်ရှစ်ဦးဒဏ်ရာရသွားခဲ့သလို အမျိုးသားဆယ့်ခြောက်ဦးသေဆုံးပြီး နှစ်ဆယ့်ခြောက်ဦးဒဏ် ရာရသွားခဲ့ပါတယ်။
နောက်ပြီး သုံးလအရွယ်ကလေးတဦးနဲ့ သက်ကြီရွယ်အိုခုနှစ်ဦးသေဆုံးခဲ့သလို ကလေးသုံးဦးနဲ့ သက်ကြီးရွယ်အို ဆယ့်သုံးဦးဒဏ်ရာရသွားခဲ့ပါတယ်။
စစ်ကော်မရှင်တပ်ဟာ မြောက်ဦးမြို့၊ ပြည်သူ့ဆေးရုံကြီးကို ရည်ရွယ်ချက်ရှိရှိလေကြောင်းမှ ပေါင်ငါးရာဗုံးနှစ်လုံးတိုက်ခိုက်ခဲ့တာဖြစ်ပါတယ်။
စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေမှ အရပ်သားပြည်သူတွေကို နေ့စဉ်ရက်ဆက်ရည်ရွယ်ချက်ရှိရှိ ပစ်မှတ်ထားတိုက်ခိုက်နေတယ်လို့ဆိုပါတယ်။
အာရက္ခဒေသအပါအဝင် မြန်မာတနိုင်ငံလုံးမှာ စစ်ကော်မရှင်တပ်ဟာ အရပ်သားပြည်သူတွေအပေါ် အကြမ်းဖက်မှုတွေကျူးလွန်နေတာကို နိုင်ငံတကာနဲ့ ကမ္ဘာ့နိုင်ငံကြီးတွေ၊ အိမ်နီးနားချင်းနိုင်ငံတွေက အရေးယူပေးဖို့ ရက္ခိုင့်အမျိုးသားအဖွဲ့ချုပ်ကတောင်းဆိုထားပါတယ်။
အဲဒီမြောက်ဦးဆေးရုံကို စစ်ကော်မရှင်တပ်လေကြောင့်တိုက်ခိုက်ခဲ့လို့ ပြည်သူတွေသေဆုံးဒဏ်ရာရခဲ့ကြတာမို့ ကမ္ဘာ့ကုလသမဂ္ဂအပါအဝင် နိုင်ငံတကာအ သိုင်းအဝိုင်းက ကန့်ကွက်ရှုပ်ချနေကြပါတယ်။
