Border News Agency
သံတွဲ၊ ဒီဇင်ဘာ ၃၀။
အာရက္ခတပ်တော်ထိန်းချုပ်ထားတဲ့ သံတွဲမြို့နယ်၊ ငပလီမြို့ကို စစ်ကော်မရှင်တပ်လေကြောင်းတိုက်ခိုက်လို့ အရပ်သားခုနှစ်ဦးသေဆုံးခဲ့ပြီး ဆယ့်ငါးဦးဒဏ်ရာရသွားခဲ့တယ်လို့ ဒေသခံတွေကဆိုကြပါတယ်။
အဲဒီငပလီမြို့ကို ဒီဇင်ဘာလ ၂၉ ရက်၊ ညနေ ၈ နာရီအချိန်ခန့်က စစ်ကော်မရှင်တပ်လေကြောင်းတိုက်ခိုက်ခဲ့တာကြောင့် ကလေးတဦးအပါအဝင် အရပ်သားခုနှစ်ဦးသေဆုံးပြီး ဆယ့်ငါးဦးဒဏ်ရာရသွားခဲ့ပါတယ်။
ငပလီမြို့၊ လင်းသာရပ်ကွက်၊ ကျင်းကန်ကြီးရွာမှ နွယ်နွယ်မျိုး၊ တင်မြင့်၊ သုံးပုံ၊ ဝင်းဝင်းရွှီ၊ အငယ်၊ စိုးကျော်ဝင်းနဲ့ နောက်ထပ်တဦး သေဆုံးသွားတယ်လို့ ဒေသခံတွေကဆိုကြပါတယ်။
အဲဒီအပြင် အသက်ဆယ့်သုံးနှစ်အရွယ် မောင်ထွန်းထွန်းဝင်း၊ အသက်နှစ်ဆယ်အရွယ် ကိုကျော်ဝင်းနိုင်၊ အသက်ငါးဆယ်ခြောက်နှစ်အရွယ် ဦးဝင်းနိုင်၊ အသက်သုံးဆယ်တနှစ်အရွယ် ဦးမောင်မောင်နိုင်၊ အသက်သုံးဆယ်ငါးနှစ်အရွယ် ဦးမောင်ငို၊ အသက်လေးဆယ်ရှစ်နှစ်အရွယ် ဦးသိန်းထွန်းဦး၊ အသက်လေးဆယ်ရှစ်နှစ်အရွယ် ဦးကိုလင်း၊ အသက်သုံးဆယ်ခုနှစ်နှစ်အရွယ် ဦးဖိုးဝင်း၊ အသက်နှစ်ဆယ့်ခြောက်နှစ်အရွယ် ကိုအေးမင်းထွန်း၊ အသက်လေးဆယ်ခြောက်နှစ်အရွယ်၊ ဦးမောင်သာဖြူ အသက်သုံးဆယ်တနှစ်အရွယ် ဒေါ်ဝင်းဝင်းဇော်၊ အသက်နှစ်ဆယ့်သုံးနှစ်အရွယ် မနွယ်နွယ်ဦး၊ အသက်လေးဆယ်ရှစ်နှစ်ဒေါ်ပပလင်း၊ အသက်ခြောက်ဆယ်သုံးနှစ်အရွယ် ဒေါ်ပုံချီ၊ အသက်ရှစ်ဆယ်တနှစ်အရွယ် ဒေါ်မတင်တို့ဒဏ်ရာရသွားခဲ့ပါတယ်။
စစ်ကော်မရှင်တပ်ဟာ သံတွဲမြို့နယ်၊ ငပလီမြို့၊ လင်းသာရပ်ကွက်၊ ကျင်းကန်ကြီးရွာကို ရွယ်ရည်ချက်ရှိရှိ လေကြောင်းတိုက်ခိုက်ခဲ့တာကြောင့် အရပ်သားတွေ၊ သေဆုံးဒဏ်ရာရသွားခဲ့ကြတာလို့ ဒေသခံတွေကဆိုကြပါတယ်။
အဲဒီဒဏ်ရာရသူတွေထဲမှာ ဒဏ်ရာပြင်းထန်သူတွေပါတာကြောင့် သေဆုံးမှုတွေထပ်တိုးလာနိုင်တယ်လို့ ဒေသခံတွေကဆိုကြပါတယ်။
အဲဒီအပြင် လူနေအိမ် ဆယ့်နှစ်ဆောင်မီးလောင်ပျက်စီးသွားတယ်လို့ဆိုပါတယ်။
အဲဒီသံတွဲမြို့နယ်၊ ရပ်ရှည်ရွာကို ဒီဇင်ဘာလ ၂၅ ရက်နေ့ကလည်း စစ်ကော်မရှင်တပ်လေကြောင်းတိုက်ခိုက်လို့ အမျိုးသမီးတဦးသေဆုံးခဲ့ပါတယ်။
စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေတွေအပါအဝင် သူတို့ထိန်းချုပ်ထားဆဲဖြစ်တဲ့ မြို့နယ်တွေရှိ ပြည်သူတွေကို နေ့စဥ်ပစ်မှတ်ထားတိုက်ခိုက်နေတာကြောင့် အပြစ်မဲ့အရပ်သားတွေ အစုလိုက်အပြုံလိုက် သေဆုံး၊ ဒဏ်ရာရနေကြပါတယ်။
အဲဒါကြောင့် အာရက္ခဒေသအတွင်းနေ မိဘပြည်သူတွေလည်း စစ်ကော်မရှင်တပ်ရဲ့ လေကြောင်း၊ ရေကြောင်းလက်နက်ကြီး၊ ဒရုန်းတွေတိုက်ခိုက်မှုရန်ကို အရင်ထက်ပိုမိုသတိထားကြဖို့ စစ်ရေးသတိအပြည့်အဝနေ့ ၊ ညအချိန်မရွေးသတိရှိကြဖို့ အာရက္ခတပ်တော်က အထူးအသိပေးတိုက်တွန်းထားပါတယ်။
