Border News Agency
ပြင်ဦးလွင်၊ ဇန်နဝါရီ ၁၄ ။
အာရက္ခတပ်တော်(AA) အပါအဝင် EAO အမည်ခံအဖွဲ့တွေဟာ မူးယစ်ဆေးဝါးထုတ်လုပ်ရောင်းချပြီး ငွေကြေးခဝါချမှု၊ လက်နက်မှောင်ခိုမှုနဲ့ အကြမ်းဖက်မှုတွေကို အထောက်အပံ့ပေးနေတယ်လို့ စစ်ကော်မရှင်ပြောရေးဆိုခွင့်ရ ဇော်မင်းထွန်းက စွပ်စွဲပြောဆိုလိုက်ပါတယ်။
ပြင်ဦးလွင်၊ အနီးစခန်းလေဆိပ်မှာ ဇန်နဝါရီလ ၁၄ ရက်၊ ဒီနေ့နံနက်ပိုင်းပြုလုပ်တဲ့ ရှမ်းမြောက်ဒေသမူးယစ်ဆေးဝါးနဲ့ အွန်လိုင်းလောင်းကစားပစ္စည်းတွေ သိမ်းဆည်းရမိမှုသတင်းစာရှင်းလင်းပွဲမှာ ခုလိုစွပ်စွဲပြောဆိုခဲ့တာပါ။
အဲဒီထဲမှာ အထူးသဖြင့် အာရက္ခတပ်တော်ရဲ့ မူးယစ်ဆေးဝါးသယ်ယူဖြန့်ဖြူးမှုတွေကို အကြိမ်ကြိမ်ဖမ်းဆီးရမိခဲ့ကြောင်းနဲ့ EAO အဖွဲ့တွေဟာ နိုင်ငံရေးမတည်ငြိမ်မှုကိုအခွင့်ကောင်းယူကာ မူးယစ်ဆေးဝါးထုတ်လုပ်မှုကို ဝင်ငွေရလမ်းအဖြစ်လုပ်ဆောင်နေကြတယ်လို့ စွပ်စွဲခဲ့ပါတယ်။
အဲဒီအပြင် မူးယစ်ဆေးဝါးချက်လုပ်ရာမှာသုံးတဲ့ ဓာတုပစ္စည်းတွေကို ပြည်ပနိုင်ငံတွေကနေနည်းလမ်းမျိုးစုံနဲ့ ချိတ်ဆက်သယ်ဆောင်ပြီး ထုတ်လုပ်နေကြတာဖြစ်တယ်လို့လည်း ဆိုပါတယ်။
အဲဒီမူးယစ်ဆေးဝါးနဲ့ အွန်လိုင်းလိမ်လည်မှုတိုက်ဖျက်ရေးအတွက် အိမ်နီးချင်းနိုင်ငံတွေနဲ့ ပူးပေါင်းနှိမ်နင်းနေတယ်လို့ ဆိုပါတယ်။
အဲဒီရှင်းလင်းပွဲသို့ ပြည်ထဲရေးဝန်ကြီး၊ ရဲချုပ်နဲ့ နိုင်ငံတကာစစ်သံမှူးတွေ တက်ရောက်ခဲ့ကြပါတယ်။
