Border News Agency
နေပြည်တော်၊ ဇန်နဝါရီ ၂၁။
မြန်မာနိုင်ငံမှာ အာဏာသိမ်းစစ်အုပ်စုကကျူးလွန်နေတဲ့ လူသားမျိုးနွယ်အပေါ်ရာဇဝတ်မှုတွေကို လွတ်လပ်မှုနဲ့တရားမျှတမှုကင်းမဲ့တဲ့ ရွေးကောက်ပွဲအတုတွေနဲ့ ဖုံးကွယ်လို့မရနိုင်ဘူးလို့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းကဆိုပါတယ်။
ကုလသမဂ္ဂအဖွဲ့ဝင်နိုင်ငံတွေရဲ့ နယ်နိမိတ်အတွင်းရောက်ရှိလာတဲ့ ရာဇဝတ်မှုသံသယရှိသူတွေကို ထိရောက်စွာအရေးယူနိုင်မယ့် အစီအမံတွေကိုကြိုဆိုတယ်လို့ ဆိုပါတယ်။
လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေကာကွယ်ရေးနဲ့ အပြစ်ပေးရေးဆိုင်ရာ အပြည်ပြည်ဆိုင်ရာ သဘောတူစာချုပ်ပေါ်ပေါက်လာရေးအတွက် ဥပဒေမူကြမ်းမှာထည့်သွင်းထားတဲ့ အချက်တွေကိုလည်း သူကထောက်ခံခဲ့တာဖြစ်ပါတယ်။
အကြမ်းဖက်စစ်အုပ်စုဟာ ရိုဟင်ဂျာတွေအပေါ်မှာသာမက မြန်မာပြည်သူအားလုံးအပေါ် အပြည်ပြည်ဆိုင်ရာရာဇဝတ်မှုတွေကို ဆက်လက်ကျူးလွန်နေတယ်လို့ ဆိုပါတယ်။
အဲဒီအပြင် အပြည်ပြည်ဆိုင်ရာစာချုပ်မရှိသေးတဲ့ ဥပဒေဟာကွက်ကိုအခွင့်ကောင်းယူပြီး သူတို့ကျူးလွန်ခဲ့တဲ့အပြစ်တွေကနေ လွတ်မြောက်ခွင့်ရဖို့ ကြိုးပမ်းနေတယ်လို့လည်း ဆိုပါတယ်။
မြန်မာနိုင်ငံမှာ စစ်အာဏာသိမ်းချိန်ကစလို့ ဒီမိုကရေစီတက်ကြွလှုပ်ရှားသူတွေနဲ့ အရပ်သားပြည်သူ ခုနှစ်ထောင့်ခြောက်ရာ့ကိုးဆယ့်ငါးဦးအသက်ဆုံးရှုံးခဲ့ရသလို လေကြောင်းတိုက်ခိုက်မှုတွေကြောင့်လည်း လေးထောင့်ခြောက်ရာ့ရှစ်ဆယ့်သုံးဦး သေဆုံးခဲ့ရတယ်လို့ AAPP မှတ်တမ်းတွေကို ကိုးကားပြီးပြောခဲ့ပါတယ်။
အဲဒီကိန်းဂဏန်းတွေဟာ လူသားမျိုးနွယ်အပေါ် ရာဇဝတ်မှုတွေကျူးလွန်နေတာကို သိသိသာသာထင်ဟပ်နေတယ်လို့ ဆိုပါတယ်။
