Border News Agency
မန္တလေး၊ ဇန်နဝါရီ ၂၅။
မန္တလေးတိုင်း၊ မြင်းခြံမြို့ပေါ်မှာ ဇန်နဝါရီ လ၂၄ ရက်နေ့က စစ်ကော်မရှင်တပ်ရဲ့ လက်ပါးစေပျူစောထီးတဦးကို လက်နက်ခဲယမ်းတွေနဲ့အတူ ဖမ်းဆီးရမိခဲ့တယ်လို့ Myingyan Twenty-one Guerilla Force (MTGF) ကထုတ်ပြန်ပါတယ်။
အဲဒီ ပျူစောထီးဟာ မဲရုံစောင့်နေရင်း အပြင်ခဏထွက်လာတဲ့အချိန်မှာ တော်လှန်ရေးတပ်ဖွဲ့တွေက ကာဘိုင်သေနတ်တလက်၊ ကျည်ဆန်တွေနဲ့အတူ အရှင်ဖမ်းမိခဲ့တာပါ။
အဲဒီဖမ်းဆီးမှုကို MTGF အဖွဲ့နဲ့အတူ TFM ပြောက်ကျားတပ်ဖွဲ့၊ TLK ပြောက်ကျားတပ်ဖွဲ့တို့က စုပေါင်းပြီး မြို့ပေါ်မှာတင် စစ်ဆင်ရေးလုပ်ခဲ့ကြတာ ဖြစ်ပါတယ်။
အဲဒီလို မြို့ပေါ်မှာစစ်ကော်မရှင်တပ် လုံခြုံရေးတွေတင်းကျပ်ထားတဲ့ကြားက အခုလို လက်နက်နဲ့တကွ ဖမ်းဆီးနိုင်ခဲ့တာပဲ ဖြစ်ပါတယ်။
စစ်ကော်မရှင်က ပြုလုပ်ဖို့ပြင်ဆင်နေတဲ့ ရွေးကောက်ပွဲအတွက် မဲစာရင်းကောက်ယူတာနဲ့ မဲရုံလုံခြုံရေးယူပေးနေတဲ့ လုပ်ငန်းစဉ်တွေမှာ ပါဝင်ပတ်သက်နေသူတွေကိုတားဆီးဖို့ တော်လှန်ရေးအဖွဲ့တွေက မြို့ပြစစ်ဆင်ရေးတွေ လုပ်ဆောင်နေတာ ဖြစ်ပါတယ်။
အဲဒီဖမ်းမိထားတဲ့ ပျူစောထီးကို သက်ဆိုင်ရာတော်လှန်ရေးအဖွဲ့တွေက ထိန်းသိမ်းထားပြီး လိုအပ်တဲ့စစ်ဆေးမေးမြန်းမှုတွေ ဆက်လက်လုပ်ဆောင်နေတယ်လို့ သိရပါတယ်။
