Border News Agency
ထိုင်း၊ ဖေဖော်ဝါရီ ၃။
ထိုင်းနိုင်ငံမြောက်ပိုင်း၊ လန်းပန်းမြို့က နှစ်ပေါင်းရာချီ သက်တမ်းရှိတဲ့ Wat Mon Pu Yak (ခေါ်) Wat Santhan မြန်မာ့ဗိသုကာလက်ရာ ဘုန်းကြီးကျောင်းဆောင်ကြီးဟာ ဖေဖော်ဝါရီ ၁ ရက်နေ့က မီးလောင်ကျွမ်းသွားတယ်လို့ ထိုင်းသတင်းဌာနတွေမှာဖော်ပြပါတယ်။
မီးသတ်ကားဆယ်စီးကျော်နဲ့ ၂ နာရီကြာ ငြှိမ်းသတ်ခဲ့ရပေမယ့် ကျွန်းသစ်ဝိဟာရ ကျောင်းဆောင်ကြီးကတော့ ပြာကျသွားခဲ့ပါတယ်။
အဲဒီမီးလောင်မှုကြောင့် ကျောင်းဆောင်အတွင်းက တန်ဖိုးဖြတ်မရတဲ့ ရှေးဟောင်းပစ္စည်းတွေနဲ့ ပဓာနရုပ်ပွားတော်ကြီးပါ ပျက်စီးသွားခဲ့ရပါတယ်။
အဲဒီကျောင်းထိုင်ဘုန်းကြီးဟာ တာ့ခ် (Tak) ခရိုင်က ပွဲတခုကိုကြွနေလို့ အသက်ဘေးက ကင်းဝေးခဲ့တယ်လို့ဆိုပါတယ်။
အဲဒီကျောင်းမီးမလောင်ခင် ပေါက်ကွဲသုံးချက်လောက်ကြားခဲ့ရပြီးမှ မီးကူးစက်သွားတာလို့ ဆိုပါတယ်။
လက်ရှိမှာတော့ အာဏာပိုင်တွေက မီးလောင်ရတဲ့အကြောင်းရင်းကို အသေးစိတ်စုံစမ်းစစ်ဆေးနေဆဲ ဖြစ်ပါတယ်။
