Border News Agency
ကန်ချနပူရီ၊ ဖေဖော်ဝါရီ ၁၅။
တနင်္သာရီမြစ်အတွင်းကရရှိခဲ့တဲ့ အလေးချိန် ၄၃၄ ဂရမ်ရှိ ရွှေခဲ ၂၅ ခဲနဲ့အတူ ထိုင်းနိုင်ငံအတွင်းသို့ တရားမဝင်ဝင်ရောက်လာတဲ့မြန်မာနိုင်ငံသားတဦးကို ကန်ချနပူရီခရိုင်၊ ဒုန်းစပ်ပရော့ မှောင်ခိုးလမ်းမှာ ဖေဖော်ဝါရီလ ၁၃ ရက်နေ့က ထိုင်းလုံခြုံရေးပူးပေါင်းအဖွဲ့က ဖမ်းဆီးရမိခဲ့တယ်လို့ သိရပါတယ်။
အဲဒီ ဖမ်းဆီးရမိသူမှာ အသက် ၅၄ နှစ်အရွယ် ဦးဘွိုင်း (Mr. Boy Wongwai / Boy Diamond) ဖြစ်ပြီး သူဆီက ရွှေသတ္တုရိုင်း (ရွှေခဲ) ၂၅ ခဲကို ရှာဖွေတွေ့ရှိခဲ့တယ်လို့ ထုတ်ပြန်ထားပါတယ်။
ဦးဘွိုင်းရဲ့ ထွက်ဆိုချက်အရ အဲဒီရွှေခဲတွေကို မြန်မာနိုင်ငံ၊ တနင်္သာရီတိုင်း၊ မေတ္တာမြို့နယ်၊ ထီးခီးကျေးရွာအနီးရှိ တနင်္သာရီမြစ်အတွင်းမှာ သူငယ်ချင်းဖြစ်သူတွေနဲ့အတူ ကိုယ်တိုင်ရွှေကျင်ယူခဲ့တာဖြစ်တယ်လို့ ဆိုပါတယ်။
အဲဒီရွှေခဲတွေကို ကန်ချနပူရီမြို့ပေါ်ရှိ ရွှေဆိုင်တွေမှာ သွားရောက်ရောင်းချဖို့အတွက် မှောင်ခိုးလမ်းကတဆင့် ခိုးဝင်လာခဲ့တာဖြစ်တယ်လို့လည်း ဝန်ခံထွက်ဆိုထားတယ်လို့ သိရပါတယ်။
လက်ရှိမှာတော့ ဖမ်းဆီးရမိသူကို ကန်ချနပူရီမြို့မရဲစခန်းမှာ ထိန်းသိမ်းထားပြီး လူဝင်မှုကြီးကြပ်ရေးဥပဒေအပြင် အကောက်ခွန်ဥပဒေတွေနဲ့ပါ အရေးယူဆောင်ရွက်နေတယ်လို့ သိရပါတယ်။
နယ်စပ်တလျှောက် တရားမဝင်မှောင်ခိုးလမ်းတွေကနေ ခိုးဝင်မှုတွေကိုလည်း ထိုင်းလုံခြုံရေးတပ်ဖွဲ့ဝင်တွေက အရှိန်အဟုန်မြှင့် စစ်ဆေးနေတယ်လို့လည်း ထုတ်ဖော်ပြောကြားထားပါတယ်။
