Border News Agency
တနင်္သာရီတိုင်း၊ မေ ၃၀။
တနင်္သာရီတိုင်း၊ ကေအဲန်ယူတပ်မဟာ ၄ နယ်မြေထဲမှာ နှစ်ပေါင်း ၂၀ ကျော်ကြာအခြေချတပ်စွဲထားတဲ့ အာဏာသိမ်းစစ်တပ်ရဲ့ ကျောက်လုံးကြီးဗျူဟာစခန်းကို တော်လှန်ရေးပူးပေါင်းတပ်တွေက ၁၀ ရက်ကြာတိုက်ခိုက်ပြီးနောက် အပြီးသတ်သိမ်းပိုက်နိုင်ခဲ့တယ်လို့ KNU မြိတ် – ထားဝယ်ခရိုင်က မေလ ၃၀ ရက်၊ ဒီနေ့ထုတ်ပြန်ပါတယ်။
အဲဒီစခန်းကို ကရင်လွတ်မြောက်ရေးတပ်မတော် (KNLA) တပ်မဟာ ၄၊ ဗျူဟာအမှတ် ၁ရဲ့ ဦးဆောင်မှုနဲ့ KNDO တပ်ရင်း ၇ အပါအဝင် မဟာမိတ်ပူးပေါင်းတပ်တွေက မေလ ၁၉ ရက်နေ့ကတည်းက စတင်တိုက်ခိုက်ခဲ့တာဖြစ်ပြီး မေလ ၂၉ ရက်နေ့ ညနေပိုင်းမှာစခန်းတခုလုံးကို အပြီးပြတ်တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
အဲဒီစစ်ဆင်ရေးအတွင်း ရဲရဲရင့်ရင့်ပေးဆပ်ခဲ့ကြတဲ့ ကေအဲန်ယူဗျူဟာအမှတ် ၁ လက်အောက်ခံတပ်တွေ၊ မဟာမိတ်တော်လှန်ရေး ပူးပေါင်းတပ်ဖွဲ့တွေကခေါင်းဆောင်တွေ၊ အရာရှိတွေနဲ့ ရဲဘော်ထုတရပ်လုံးကို လေးနက်စွာအသိအမှတ်ပြု တန်ဖိုးထားဂုဏ်ပြုတယ်လို့လည်းဆိုပါတယ်။
အဲဒီတိုက်ပွဲအတွင်း အသက်နဲ့ခန္ဓာပေးဆပ်သွားခဲ့ရတဲ့ သူရဲကောင်းရဲဘော်တွေ၊ ပြည်သူလူထုတွေနဲ့ တိုက်ပွဲအတွက် ဘက်ပေါင်းစုံကနေ ပံ့ပိုးကူညီပေးခဲ့ကြတဲ့ မိဘပြည်သူတရပ်လုံးကိုလည်း ကေအဲန်ယူ မြိတ် – ထားဝယ်ခရိုင်ကနေ လှိုက်လှိုက်လှဲလှဲဂုဏ်ပြုထားတယ်လို့ဆိုပါတယ်။
အဲဒီကျောက်လုံးကြီးစခန်းဟာ ကမ်းရိုးတန်းတိုင်းစစ်ဌာနချုပ် လက်အောက်ခံ ခမရ ၄၃၃ တပ်ရင်းက အင်အား ၈၀ ကျော်နဲ့ ဗျူဟာကာကင်းအဖြစ် ပြန်လည်ဝင်ရောက် တပ်စွဲထားခဲ့တာဖြစ်ပြီး အခုသိမ်းပိုက်မှုအတွင်း လက်နက်ခဲယမ်းအများအပြားကိုလည်း သိမ်းဆည်းရမိခဲ့တယ်လို့ ဆိုပါတယ်။
