Border News Agency
ကျောက်ဖြူ၊ မေ ၃၀။
ကျောက်ဖြူမြို့နယ်မှာ မေလ ၂၉ ရက်၊ မနေ့က အာဏာသိမ်းစစ်တပ် လက်နက်ကြီးပစ်ခတ်လို့ စစ်ဘေးရှောင်တဦးသေဆုံးသွားတယ်လို့ ဒေသခံတွေဆီကသိရပါတယ်။
အဲဒီကျောက်ဖြူမြို့နယ်၊ ပေါက်ပြင်ရွာကို မေလ၂၉ ရက်၊ မနက် ၇ နာရီကျော်အချိန်ခန့်က အာဏာသိမ်းစစ်တပ်က လက်နက်ကြီးနဲ့ရွယ်ရည်ချက်ရှိရှိ ပစ်ခတ်ခဲ့တယ်လို့ဆိုကြပါတယ်။
အဲဒီလိုပစ်ခတ်ခဲ့တာကြောင့်ပေါက်ပြင်ရွာမှာ စစ်ဘေးရှောင်နေတဲ့စနဲမြို့၊ ကံပြင်ရပ်ကွက်မှ အသက်နှစ်ဆယ့်လေးနှစ်အရွယ် ကိုစိုးထက်ပိုင်သေဆုံးခဲ့တယ်လို့ဆိုပါတယ်။
အဲဒီအပြင်ဦးရဲထွန်းနိုင်ရဲ့နေအိမ်တလုံးနဲ့ နောက်ထပ်နေအိမ်တလုံးလည်း ပျက်စီးသွားခဲ့တယ်လို့ ဆိုကြပါတယ်။
အဲဒီကျောက်ဖြူမြို့နယ်၊ ရွာသစ်ကေရွာကို မေလ ၁၇ ရက်နေ့က ဇင်ချောင်းပင်လယ်ပြင်မှာရှိနေတဲ့ အာဏာသိမ်းစစ်တပ်ရဲ့ ရေတပ်သင်္ဘောတစီးကနေ လက်နက်ကြီးတွေပစ်ခတ်ခဲ့တာကြောင့် အပြစ်မဲ့ပြည်သူတဦးသေဆုံးပြီး ဆရာတော်တပါးအပါအဝင် ပြည်သူခြောက်ဦး ဒဏ်ရာရသွားခဲ့ပါတယ်။
ကျောက်ဖြူမြို့နယ်အတွင်းမှာ အာရက္ခတပ်တော် (AA) နဲ့ အာဏာသိမ်းစစ်တပ်တို့အကြား နှစ်ဖက်ထိတွေ့တိုက်ပွဲတွေ ပြင်းထန်နေတာကြောင့် အာဏာသိမ်းစစ်တပ်ဘက်က မြို့နဲ့အနီးနားက ကျေးရွာတွေကို လက်နက်ကြီး၊ တိုက်လေယာဥ်တွေ၊ ဒရုန်းတွေနဲ့ပစ်ခတ်တိုက်ခိုက်တာတွေလုပ်ဆောင်နေတယ်လို့ သိရပါတယ်။
အာဏာသိမ်းစစ်တပ်က လေကြောင်းတိုက်ခိုက်မှုတွေ ပိုလုပ်လာတာကြောင့် ပြည်သူတွေအနေနဲ့ လေကြောင်းအန္တရာယ်ကို အထူးသတိထားကြဖို့လည်း အာရက္ခတပ်တော်က တိုက်တွန်းထားပါတယ်။
