Border News Agency
ဂွ၊ မတ် ၉။
အာရက္ခတပ်တော်ထိန်းချုပ်ထားတဲ့ ဂွမြို့နယ်၊ ကြွီချိုင်ကျေးရွာမှာ စစ်ကျန်လက်နက်ပေါက်ကွဲလို့ ကလေးတဦးသေဆုံးပြီး နှစ်ဦးဒဏ်ရာရသွားတယ်လို့ သိရပါတယ်။
ဂွမြို့နယ်၊ ကြွီချိုင်ရွာမှ အသက်ဆယ့်နှစ်နှစ်အရွယ်မောင်ဝေယံလင်းသေဆုံးသွားခဲ့ပြီး အသက်ဆယ့်နှစ်နှစ်အရွယ်မောင်ကျော်ကိုကိုနဲ့ အသက်ဆယ့်တနှစ်အရွယ် မောင်ထွန်းလင်းနိုင်ဒဏ်ရာရသွားခဲ့တာပါ။
အဲဒီကလေးသုံးဦးဟာ မတ်လ ၈ ရက်၊ နေ့လည် ၂ နာရီခွဲအချိန်ခန့်က ကြွီချိုင်ရွာနားပင်လယ်ကမ်းခြေမှာ စစ်ကျန် RPG တလုံးတွေ့လို့ ဆော့ကစားရာကနေပေါက်ကွဲသွားတယ်လို့ ဒေသခံတွေကဆိုပါတယ်။
စစ်ကျန်လက်နက်ပေါက်ကွဲမှုကြောင့် မောင်ဝေယံလင်းဟာ နေရာမှာတင်သေဆုံးသွားခဲ့ပြီး မောင်ကျော်ကိုကိုနဲ့ထွန်းလင်းနိုင်မှာလည်း ခန္ဓာကိုယ်အနှံ့ဒဏ်ရာရသွားခဲ့ပါတယ်။
လက်ရှိမှာ ဒဏ်ရာရသွားတဲ့မောင်ကျော်ကိုကိုနဲ့ ထွန်းလင်းနိုင်ဟာ အရေးပေါ်ဆေးကုသမှုခံယူနေရတယ်လို့ သိရပါတယ်။
အာရက္ခတပ်တော်ထိန်းချုပ်နယ်မြေမှာ ကလေးတွေအပါအဝင် လူကြီးတွေဟာလည်း စစ်ကျန်လက်နက်ပစွည်းတွေကိုထိတွေ့ကိုင်တွယ်ပြီး မကြာခဏသေဆုံး၊ ဒဏ်ရာရတာတွေရှိနေကြပါတယ်။
အာရက္ခတပ်တော်ဟာ သူတို့ထိန်းချုပ်မြို့နယ်တွေမှာ မိုင်းရှင်းလင်းရေးတွေလုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊ စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။
အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊ မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာလုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။
ဒါပေမယ့် အာရက္ခပြည်သူတွေဟာ စစ်ကောင်စီတပ်ရဲ့ မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊ မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
