Border News Agency
ကစယ်ဒို၊ မတ် ၁၀။
တနင်္သာရီတိုင်း၊ ကစယ်ဒို(ကျွန်းစု)မြို့နယ်မှာ မတ်လ ၁၀ ရက်၊ ဒီနေ့ မနက်ပိုင်းက မိုင်းနင်းမိလို့ အရပ်သားတဦးခြေထောက်တဖက်ပြတ်ထွက်သွားတယ်လို့ ကရင်အမျိုးသားအစည်းအရုံး(KNU)က ထုတ်ပြန်ပါတယ်။
အဲဒီကစယ်ဒိုမြို့နယ်ရှိ ဖိုးလမိုင်းနေရာအနီးမှာ ဒီနေ့ မနက် ၁၁ နာရီအချိန်ခန့်က ဒေသခံတဦးလမ်းလျှောက်လာစဉ် မိုင်းနင်းမိပြီးပေါက်ကွဲမှုဖြစ်ပွားခဲ့တာကြောင့် ဒဏ်ရာတွေရသွားတာလို့ဆိုပါတယ်။
အဲဒီမိုင်းဟာ သူတို့နယ်မြေအတွင်းလှုပ်ရှားနေတဲ့ ကော်သူးလေတပ်မတော် (KTLA)တပ်ဖွဲ့ဝင်တွေက ထောင်ထားခဲ့တဲ့မိုင်းဖြစ်တယ်လို့ KNUဘက်က စွပ်စွဲပြောဆိုထားပါတယ်။
အဲဒီဒဏ်ရာရသွားသူတွေဟာ ဒဏ်ရာပြင်းထန်တာကြောင့် အရေးပေါ်ဆေးကုသမှုခံယူနိုင်ဖို့စီစဉ်ပေးထားတယ်လို့ဆိုပါတယ်။
KNUထိန်းချုပ်နယ်မြေမှာ တော်လှန်ရေးလက်နက်ကိုင်အဖွဲ့အချင်းချင်းကြား နယ်မြေစိုးမိုးရေးနဲ့ပတ်သက်ပြီး တင်းမာမှုတွေရှိနေတာကြောင့် ဒေသခံတွေအနေနဲ့သွားလာရာမှာ အထူးသတိပြုကြဖို့ တိုက်တွန်းနှိုးဆော်ထားပါတယ်။
