Border News Agency
ပုဏ္ဏားကျွန်း၊ မတ် ၁၀။
စစ်ခေါင်းဆောင်အာဏာသိမ်း ၅ နှစ်တာကာလမှာ စစ်ရာဇဝတ်မှုတွေကိုဆက်တိုက်ကျူးလွန်နေပြီး ပြီးခဲ့တဲ့ဖေဖော်ဝါရီလမှာ လေကြောင်းတိုက်ခိုက်ခံရလို့ အာရက္ခဒေသဟာ အမျိုးသမီးသေဆုံးမှု အများဆုံးဒေသဖြစ်လာခဲ့ပါတယ်။
ဖေဖော်ဝါရီလအတွင်း နိုင်ငံတစ်ဝှမ်း အမျိုးသမီး ၆၃ ဦးသေဆုံးခဲ့ရာမှာ အာရက္ခဒေသက ၂၂ ဦးအထိပါဝင်နေပြီး ဒါဟာသေဆုံးမှုစုစုပေါင်းရဲ့ သုံးပုံတပုံခန့်ရှိနေတာလို့ မြန်မာအမျိုးသမီးသမဂ္ဂ (BWU)က မတ်လ ၁၀ ရက်၊ ဒီနေ့ထုတ်ပြန်ပါတယ်။
အဲဒီထဲ အဆိုးရွားဆုံးဖြစ်စဉ်မှာ ဖေဖော်ဝါရီလ ၂၄ ရက်နေ့က အာရက္ခတပ်တော်(AA)ထိန်းချုပ်ထားတဲ့ ပုဏ္ဏားကျွန်းမြို့နယ်၊ ယိုးတရုတ်ကျေးရွာကို စစ်ကော်မရှင်တပ်လေကြောင်းတိုက်ခိုက်လို့ အမျိုးသမီး ၁၃ ဦးအထိ အစုလိုက်အပြုံလိုက်သေဆုံးခဲ့ရပါတယ်။
အာရက္ခဒေသနောက်မှာ စစ်ကိုင်းတိုင်းမှ ၁၂ ဦးနဲ့ မကွေးတိုင်းမှ ၁၁ ဦးထိ သေဆုံးမှုအများဆုံးဖြစ်နေပါတယ်။
တနိုင်ငံလုံးအတိုင်းအတာနဲ့သေဆုံးခဲ့တဲ့ အမျိုးသမီး ၆၃ ဦးဟာ လေကြောင်းတိုက်ခိုက်မှုကြောင့် ၄၆ ဦး၊လက်နက်ကြီးကြောင့် ၈ ဦး၊မတရားသတ်ဖြတ်ခံရမှုကြောင့် ၇ ဦးနဲ့ ကျည်ထိမှန်မှုကြောင့် ၂ ဦးဖြစ်ပါတယ်။
အဲဒီသေဆုံးသူတွေထဲမှာ အသက် ၁၈ နှစ်အောက် အမျိုးသမီးငယ် ၁၈ ဦးနဲ့ ကိုယ်ဝန်ဆောင် အမျိုးသမီးတဦးတို့ပါဝင်နေပြီး ထိခိုက်ဒဏ်ရာရရှိသူ အမျိုးသမီး ၆၆ ဦးအထိရှိနေပါတယ်။
မြေပြင်မှာ ဒေတာကောက်ယူဖို့ ခက်ခဲတဲ့အခြေအနေတွေကြောင့် အမှန်တကယ်ထိခိုက်သေဆုံးသူအရေအတွက်မှာ ခုထက်ပိုမိုများပြားနိုင်တယ်လို့ မြန်မာအမျိုးသမီးသမဂ္ဂက ထောက်ပြထားပါတယ်။
