Border News Agency
ယင်းမာပင်၊ မတ် ၂၀။
စစ်ကော်မရှင်ဘက်ကိုခိုလှုံသွားတဲ့ ဗိုလ်နဂါးရဲ့ BNRA အဖွဲ့ဝင်ဟောင်းတချို့လမ်းပြပေးတာကြောင့် ယင်းမာပင်ခရိုင် တပ်ရင်း ၃၅ စခန်း စီးနင်းမီးရှို့ခံလိုက်ရတယ်လို့ မတ်လ ၁၉ ရက်နေ့မှာ သတင်းထုတ်ပြန်ပါတယ်။
အဲဒီစီးနင်းမှုကို စစ်ကော်မရှင်တပ်က မတ်လ ၇ ရက်နေ့ကတည်းက လုပ်ခဲ့တာပါ။
စီးနင်းခံရချိန်မှာ စခန်းထဲကအဆောင်တွေ၊ ရဲဘော်တွေသုံးတဲ့ပစ္စည်းတွေနဲ့ ဆိုင်ကယ် ၅ စီးအပြင် ထုတ်လုပ်ရေးပစ္စည်းတွေကိုပါ စစ်ကော်မရှင်တပ်က မီးရှို့ဖျက်ဆီးသွားပါတယ်။
ဒါပေမယ့် သတင်းလက်ဦးမှုရလိုက်တာကြောင့် ရဲဘော်တွေအားလုံးကတော့ အထိအခိုက်မရှိဘဲအချိန်မီဆုတ်ခွာနိုင်ခဲ့ပါတယ်။
ယင်းမာပင်ခရိုင် ဗျူဟာ ၄၇၊ အမှတ် ၃၅ တပ်ရင်းစခန်းကို စစ်ကော်မရှင်တပ်က လက်နက်ကြီးတွေနဲ့ အရင်ပစ်ခတ်ပြီးမှစီးနင်းခဲ့တာပါ။
အဲဒီစခန်းထဲက အရေးကြီးတဲ့ပစ္စည်းတချို့နဲ့ နောက်ချန်အင်အားတွေကိုတော့ ရဲဘော်တွေက ဘေးကင်းအောင်ရွှေ့ပြောင်းနိုင်ခဲ့တယ်လို့ ဆိုပါတယ်။
“တပ်ရင်း ၃၅ ဘက်ကတော့ စခန်းနဲ့ပစ္စည်းတွေကိုပဲ မီးရှို့လို့ရမယ်၊ ဖက်ဒရယ်ဒီမိုကရေစီအတွက် တိုက်ပွဲဝင်နေတဲ့သူတို့ရဲ့ စိတ်ဓာတ်ကိုတော့ ဘယ်လိုမှ ဖျက်ဆီးလို့မရဘူးလို့ ထုတ်ပြန်ချက်မှာတုံ့ပြန်ထားပါတယ်။
အဲဒီဒေသတဝိုက်မှာ စစ်ကော်မရှင်တပ်နဲ့ ဒေသကာကွယ်ရေးပူးပေါင်းတပ်ဖွဲ့တွေကြား စစ်ရေးတင်းမာနေဆဲဖြစ်ပြီး တော်လှန်ရေးတပ်ဖွဲ့တွေကလည်း နယ်မြေစိုးမိုးရေးအတွက် ဆက်ပြီးလုပ်ဆောင်နေတယ်လို့သိရပါတယ်။
