​Border News Agency
ကျောက်တော်၊ မတ် ၂၅။

အာရက္ခတပ်တော်ထိန်းချုပ်နယ်မြေတွေမှာ ငွေလွှဲနှုန်းတွေ စျေးတက်နေတယ်လို့ ပြည်သူတွေက ဆိုကြပါတယ်။

အရင်က ငွေကျပ်တသိန်းထုတ်ကို ဝန်ဆောင်ခငါးရာကျပ်မှတထောင်ကျပ်ဝန်းကျင်ရှိခဲ့ပေမယ့်ငွေသားရှားပါးတာကြောင့်တသိန်းကိုသုံးထောင်ငါးရာကျပ်ထိပေးနေရတယ်လို့ ဆိုကြပါတယ်။

“ကျွန်တော်တို့က ဒီမှာ ပင်ပင်ပန်းပန်း လုပ်ကိုင်ပြီး အိမ်ကမိဘတွေ စားဖို့သောက်ဖို့ ပြန်ပို့တဲ့အခါ လမ်းမှာတင် ဝန်ဆောင်ခတွေနဲ့ အများကြီး ကုန်နေပါတယ်။ မိဘတွေလက်ထဲ ရောက်တဲ့အခါ ငွေက တော်တော်လေး လျော့သွားပါတယ်။”လို့ နိုင်ငံခြားမှ ငွေလွှဲသူတဦးက Border News Agency ကို ပြောပါတယ်။

အဲဒီလိုငွေလွှဲနှုန်းတွေ တက်လာတာဟာ အေဂျင့်တွေဆီကငွေသားပြန် လည်ထုတ်ယူနိုင်ဖို့ အခက်အခဲမျိုးစုံနဲ့ ရင်ဆိုင်နေရတာကြောင့် ဖြစ်တယ်လို့ ငွေလွှဲလုပ်ငန်းလုပ်ကိုင်သူတွေက ဆိုကြပါတယ်။

ကျောက်တော်မြို့နယ်မှာ ငွေသားထုတ်ယူခဟာ အရင်ကထက် သုံးဆ၊လေးဆနီးပါးထိ ပေးနေရတယ်လို့ ငွေလွှဲလုပ်ငန်းလုပ်ကိုင်သူတွေကဆိုကြပါတယ်။

“ငွေစျေးကတော့ အခုအချိန်မှာ တသတ်မှတ်တည်း သတ်မှတ်လို့ မရသေးဘူး။ ငွေဝင်တဲ့နေ့မှစျေးသတ်မှတ်တာပါ။ ကျနော်တို့ ခုငွေတွေပြန်ထုတ်ရတာလည်း အခက်အခဲရှိနေပါတယ်။”လို့ ငွေလွှဲလုပ်သူတဦးက ဆိုပါတယ်။

ပြည်ပမှာ အလုပ်လုပ်ကိုင်နေသူတွေဟာ မိဘတွေဆီ ငွေလွှဲရာမှာ လမ်းခရီးဝန်ဆောင်ခအမျိုးမျိုးဖြတ်တောက်ခံနေရတဲ့အတွက် မိသားစုတွေဆီ ငွေအပြည့်အဝမရောက်ကြတော့ဘူးလို့ဆိုကြပါတယ်။

“အခုက ငွေလွှဲခက အရမ်းများနေတယ်။ အရင်ကတသိန်းလွှဲရင် ဝန်ဆောင်ခ နည်းနည်းပဲ ပေးရတာ။အခုကတော့ ငွေထုတ်တဲ့သူဘက်ကလည်း ဝန်ဆောင်ခတွေ တိုးတောင်းနေတော့ မိဘတွေဆီ ပို့ရတာ တော်တော်ခက်ခဲနေပါတယ်။”လို့ နောက်ထပ် ငွေလွှဲသူတဦးက ပြောပါတယ်။

ငွေလွှဲခငွေထုတ်ခတွေ အဆမတန်တ က်လာတာဟာ ဒေသတွင်းကုန်စည်စီးဆင်းမှုနဲ့အခြေခံလူတန်းစားတွေရဲ့ စားဝတ်နေရေးအပေါ် များစွာထိခိုက်မှုရှိနေတယ်လို့ ပြည်သူတွေက ဆိုကြပါတယ်။

အာရက္ခတပ်တော်ထိန်းချုပ်နယ်မြေတွေရှိ ပြည်သူတွေနဲ့ ပြည်ပရောက်လုပ်သားတွေဟာ ကုန်စျေးနှုန်းကြီးမြင့်မှုဒဏ်အပြင် ငွေကြေးစီးဆင်းမှု ခက်ခဲတဲ့ဒဏ်ကိုပါခံစားနေကြရတာ ဖြစ်ပါတယ်။

အဲဒါကြောင့် အာရက္ခတပ်တော်ထိန်းချုပ်နယ်မြေတွေမှာငွေကြေးစီးဆင်းမှု ပြန်လည်မှန်ကန်လာစေဖို့အတွက် ဘဏ်လုပ်ငန်းနဲ့ ငွေလွှဲလုပ်ငန်းတွေကို စနစ်တကျ ကြပ်မတ်ထိန်းညှိပေးဖို့ လိုအပ်နေတယ်လို့ ပြည်သူတွေကဆိုကြပါတယ်။