Border News Agency
ကွတ်ခိုင်၊ မတ် ၂၅။
ရှမ်းပြည်မြောက်ပိုင်း၊ ကွတ်ခိုင်မြို့နယ်၊ နမ့်ဖတ်ကာကျေးရွာမှာရှိတဲ့ တအာင်းလူမျိုးတွေရဲ့ နေအိမ်အချို့ကို MNDAA တပ်ဖွဲ့က ချိတ်ပိတ်တာနဲ့ အိမ်တွင်းပစ္စည်းတွေကို ဖျက်ဆီးတာတွေလုပ်ဆောင်နေတယ်လို့ Ta’ang Women’s Organization (TWO) က ထုတ်ပြန်ပါတယ်။
နမ့်ဖတ်ကာ ရပ်ကွက် ၃ အတွင်းမှာရှိတဲ့ TNLA ရဲစခန်းအနီးက တအာင်းနေအိမ် ၇ အိမ်ထက်မနည်းကို မတ်လ ၁၄ ရက်နေ့ကစပြီး MNDAAက ဝင်ရောက်မွှေနှောက်ခဲ့သလို အိမ်ရှင်တွေကိုလည်း နေအိမ်အတွင်း ပေးမဝင်တော့ဘူးလို့ ဒေသခံတွေက ဆိုကြပါတယ်။
အဲဒီအပြင်ကိုးကန့်တပ်ဖွဲ့ဝင်တွေဟာ နေအိမ်အတွင်းက တန်ဖိုးကြီးပရိဘောဂတွေကို ယူဆောင်သွားပြီး ကျန်တဲ့အသုံးအဆောင်ပစ္စည်းတွေကိုလည်း ရည်ရွယ်ချက်ရှိရှိဖျက်ဆီးခဲ့တယ်လို့ဆိုပါတယ်။
နောက်ပြီး ဒေသခံအိမ်ပိုင်ရှင်တွေကို TNLA တပ်ဖွဲ့ဝင်မဟုတ်ဘဲ အရပ်သားဖြစ်ကြောင်း ဝန်ခံကတိ လက်မှတ်ထိုးခိုင်းတာတွေ ရှိနေသလို TNLA နဲ့ ပတ်သက်တဲ့ လက်နက်ခဲယမ်းတွေ ရှိရင်လည်း လာရောက်အပ်နှံဖို့ ဖိအားပေးတာတွေ ရှိနေတယ်လို့ဆိုပါတယ်။
အဲဒီလိဝန်ခံကတိ လက်မှတ်ထိုးခိုင်းတဲ့နေရာမှာ ရပ်ကွက်အတွင်းရှိတရုတ်လူမျိုးအုပ်ချုပ်ရေးမှူးတွေနဲ့ တရုတ်စာပေယဉ်ကျေးမှုအဖွဲ့တွေကိုပါ အသုံးပြုပြီး လုပ်ခိုင်းနေတာလို့ ဒေသခံတွေက ဆိုကြပါတယ်။
နေအိမ်ကိုပြန်ဝင်ခွင့်တောင်းတဲ့ အိမ်ရှင်တွေကိုလည်း ပါးစပ်ပိတ်ထားဖို့နဲ့မလိုက်နာရင် ဖမ်းဆီးချုပ်နှောင်မယ်လို့ MNDAA ဘက်က ခြိမ်းခြောက်မှုတွေ ရှိနေတာကြောင့် ဒေသခံတွေဟာ စိုးရိမ်ထိတ်လန့်နေကြရတယ်လို့လည်းဆိုပါတယ်။
