Border News Agency
ထိုင်း၊ သြဂုတ် ၁၀။
ထိုင်းနိုင်ငံ၊နွန်သဘူရီခရိုင် အုပ်ချုပ်ရေးအဖွဲ့ (PAO)ရုံး၊အုပ်ချုပ်ရေးအဖွဲ့ဥက္ကဋ္ဌရဲမှူးကြီး သောင်ချိုင်ယန်ပရာဆတ်သေနတ်နဲ့ ပစ်ခတ်ခံရပြီး ဒဏ်ရာရရှိခဲ့တယ်လို့ ရဲတပ်ဖွဲ့က ဩဂုတ်လ ၁၀ ရက်၊ဒီနေ့ထုတ်ပြန်ပါတယ်။
အဲဒီပစ်ခတ်မှုကို နွန်သဘူရီခရိုင် လွှတ်တော်အမတ်ဟောင်း ဆာလောင် ရီယောင်ဝရန်းက ကျူးလွန်ခဲ့တာဖြစ်တယ်လို့ဆိုပါတယ်။
အဲဒီပစ်ခတ်မှုကြောင့် အုပ်ချုပ်ရေးအဖွဲ့ဥက္ကဋ္ဌရဲမှူးကြီး သောင်ချိုင် သေနတ်ဒဏ်ရာလေးချက်ထိမှန်ခဲ့သလို သူရဲ့ယာဉ်မောင်းဖြစ်သူလည်း ကျည်ထိမှန်ဒဏ်ရာရရှိခဲ့တာကြောင့် နှစ်ဦးလုံးကို ဆေးရုံသို့အရေးပေါ် ပို့ဆောင်ထားပါတယ်။
လက်ရှိမှာ ရဲတပ်ဖွဲ့ဝင်တွေက အခင်းဖြစ်နေရာကို စစ်ဆေးတာ၊သက်သေအထောက်အထားတွေ စုဆောင်းတာနဲ့ မျက်မြင်သက်သေတွေကို စစ်ဆေးမေးမြန်းတာတွေလုပ်နေပြီး ပစ်ခတ်ခံရတဲ့အကြောင်းအရင်းကို အာဏာပိုင်တွေအတည်မပြုသေးပါဘူး။
အဲဒီရဲမှူးကြီးသောင်ချိုင်ဟာ နွန်သဘူရီခရိုင်ရဲ့ ရွေးကောက်ခံ ဒေသဆိုင်ရာအုပ်ချုပ်ရေးအဖွဲ့ဥက္ကဋ္ဌ တာဝန်ယူထားသူဖြစ်ပါတယ်။
