Border News Agency
မင်းပြား၊မတ် ၂၅။
မင်းပြားမြို့နယ်၊ သဲတန်းရွာမှာရှိတဲ့ Music Love KTV မှာ မူးယစ်ဆေးဝါးလက်ဝယ်ထားပြီး ရောင်းချနေသူတဦးကို အာရက္ခပြည်သူ့တော်လှန်ရေးအစိုးရရဲ့ တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (ဒီလပ်) က ဖမ်းဆီးလိုက်ပါတယ်။
အဲဒီဖမ်းဆီးရမိသူဟာ မြောက်ဦးမြို့ နယ်၊သရက်တောရွာက အသက်နှစ်ဆယ်ရှစ်နှစ်အရွယ်မျိုးလှိုင်ဝင်းဖြစ်ပြီး သူ့ဆီက WY စိတ်ကြွဆေးပြား ၅၅၇ ပြားနဲ့အတူ မူးယစ်ဆေးရောင်းရငွေလို့ ယူဆရတဲ့ မြန်မာငွေကိုးသိန်းခြောက်သောင်းကျော်သိမ်းဆည်းရမိခဲ့တာပါ။
အဲဒီအပြင် သူ့ရဲ့အခန်းထဲက လက်ကိုင်ဖုန်းနှစ်လုံး၊ဆယ်လက်မခန့်ရှိတဲ့ ဓားဦးချွန်တလက်၊အရက်ပုလင်းတွေနဲ့အတူ သူအသုံးပြုတဲ့ Wave ဆိုင်ကယ်တစီးနဲ့ Hilux Surf အိမ်စီးကားတစီးကိုသိမ်းဆည်းခဲ့ပါတယ်။
အဲဒီဖမ်းမိသူကို မူးယစ်ဆေးဝါးနဲ့စိတ်ကိုပြောင်းလဲစေတတ်တဲ့ ဆေးဝါးများဆိုင်ရာဥပဒေပုဒ်မတွေနဲ့ အမှုဖွင့်ထားပြီး ထောင်ဒဏ်အနှစ်နှစ်ဆယ်မှသေဒဏ်ထိချမှတ်နိုင်တဲ့ပြစ်မှုတွေဖြစ်တယ်လို့ ဆိုပါတယ်။
အဲဒီအမှုကွင်းဆက်တရားခံတွေကို ဆက်စုံစမ်းဖော်ထုတ်နေပြီး ဥပဒေနဲ့အညီ ထိထိရောက်ရောက် အရေးယူသွားမယ်လို့ ဆိုပါတယ်။
ပြည်သူတွေလည်း မူးယစ်ဆေးဝါးတိုက်ဖျက်ရေးကို အမျိုးသားရေးတာဝန်အဖြစ် သတ်မှတ်ပြီး မူးယစ်ဆေးနဲ့ပတ်သက်တဲ့သတင်းတွေကို အချိန်နဲ့တပြေးညီ သတင်းပေးပို့ကြဖို့ တိုက်တွန်းထားပါတယ်။
