Border News Agency
ထိုင်း၊ မတ် ၃၀။
အာဏာသိမ်းစစ်ခေါင်းဆောင် မင်းအောင်လှိုင်ဟာ ပြည်သူ့ဘဏ္ဍာတွေကို နည်းမျိုးစုံနဲ့ ခိုးယူပြီး သူ့သားသမီးတွေရဲ့ စီးပွားရေးလုပ်ငန်းတွေဆီ ငွေကြေးစီးဆင်းအောင် လုပ်ဆောင်နေတယ်လို့ Justice for Myanmar (JFM) က မတ်လ ၂၉ ရက်နေ့မှာ ထုတ်ပြန်ပါတယ်။
အဲဒီလို အကျင့်ပျက်ခြစားနေတာတွေကို အရေးယူမခံရဘဲ လွတ်မြောက်နေတဲ့ အခြေအနေကို အဆုံးသတ်ရမယ့်အချိန် ရောက်ပြီလို့လည်း ဆိုပါတယ်။
မင်းအောင်လှိုင်ရဲ့ သားသမီးတွေဖြစ်တဲ့ အောင်ပြည့်စုံနဲ့ ခင်သီရိသက်မွန်တို့ဟာ အစားအသောက်၊ဆေးဝါး၊ ဆောက်လုပ်ရေး၊ မီဒီယာနဲ့ ဆက်သွယ်ရေး တာဝါတိုင်လုပ်ငန်းတွေမှာ စစ်တပ်အာဏာကို အသုံးချပြီး အကျိုးအမြတ်တွေ ရယူနေကြတယ်လို့ဆိုပါတယ်။
အဲဒီအပြင် အဂတိနည်းနဲ့ ရရှိထားတဲ့ ငွေကြေးတွေကို အသုံးပြုပြီး ထိုင်းနိုင်ငံ ဘန်ကောက်မြို့မှာ ဘတ်သန်းပေါင်းများစွာ တန်ဖိုးရှိတဲ့ ဇိမ်ခံကွန်ဒိုနဲ့ အိမ်ရာတွေကို ဝယ်ယူထားတယ်လို့ ဆိုပါတယ်။
အဲဒီလို အရေးယူပိတ်ဆို့မှုတွေကနေ လွတ်မြောက်နေတဲ့ မင်းအောင်လှိုင်ရဲ့ ချွေးမဖြစ်သူ မျိုးရတနာထိုက်ကိုပါ အရေးယူပေးဖို့ JFM က နိုင်ငံတကာကို တောင်းဆိုထားပါတယ်။
ဒါ့အပြင် ထိုင်းအစိုးရအနေနဲ့လည်း ဒီမိသားစုရဲ့ ငွေကြေးခဝါချမှုတွေကို စုံစမ်းစစ်ဆေးဖို့နဲ့ သိမ်းဆည်းရမိတဲ့ ပိုင်ဆိုင်မှုတွေကို နောင်တချိန် ပေါ်ပေါက်လာမယ့် ဖက်ဒရယ်ဒီမိုကရေစီအစိုးရထံ ပြန်လည်လွှဲပြောင်းပေးဖို့ တိုက်တွန်းထားပါတယ်
