Border News Agency
ဝါရှင်တန်၊ ဧပြီ ၁၂ ။
အီရန်ရဲ့ရေတပ်အင်အားဟာ လုံးဝပျက်စီးသွားပြီဖြစ်ပြီး လက်ရှိမှာအမေရိကန်အနေနဲ့ စစ်ရေးအရအပြတ်အသတ်အသာစီးရနေတယ်လို့ သမ္မတဒေါ်နယ်ထရမ့် က NBC သတင်းဌာနနဲ့ တွေ့ဆုံစဉ်ပြောကြားလိုက်ပါတယ်။
ဟော်မုဇ်ရေလက်ကြား ပိတ်ဆို့ခံရမှုနဲ့ပတ်သက်တဲ့ သတင်းထောက်ရဲ့အမေးကို ထရမ့်ကတုံ့ပြန်ရာမှာ အီရန်ရဲ့ရေယာဉ်ပေါင်း ၁၅၈ စီးဟာ ပင်လယ်ရေအောက်ကို ရောက်သွားပြီဖြစ်ကြောင်းနဲ့ သူတို့မှာရေတပ်မရှိတော့ဘူးလို့ဆိုပါတယ်။
အထူးသဖြင့် အီရန်ရဲ့ မိုင်းရှင်းလင်းရေးသင်္ဘောတွေနဲ့ မိုင်းချသင်္ဘော ၂၈ စီးလုံးကို အမေရိကန်ကချေမှုန်းနိုင်ခဲ့တာကြောင့် အီရန်ရဲ့ ခြိမ်းခြောက်မှုတွေဟာ ထိရောက်တော့မှာမဟုတ်ဘူးလို့ သမ္မတကပြောဆိုတာပါ။
”ဘာပဲဖြစ်ဖြစ် ငါတို့ကအနိုင်ရမှာပဲ” လို့ ထရမ့်ကကြုံးဝါးခဲ့ပြီး အီရန်ရဲ့စစ်ရေးစွမ်းဆောင်ရည်ဟာ အခုအခါမှာလုံးဝကိုအားနည်းသွားပြီဖြစ်တယ်လို့လည်း ထည့်သွင်းပြောကြားခဲ့ပါတယ်။
လက်ရှိမှာပါကစ္စတန်မှာပြုလုပ်နေတဲ့ အပစ်ရပ်ဆွေးနွေးပွဲတွေ ရလဒ်မထွက်ဘဲဖြစ်နေချိန်မှာ သမ္မတထရမ့်ရဲ့အခုလိုပြင်းထန်တဲ့ ပြောကြားချက်တွေကြောင့် အရှေ့အလယ်ပိုင်းတင်းမာမှုတွေ ပိုမိုမြင့်တက်လာနိုင်တယ်လို့ လေ့လာသူတွေကသုံးသပ်နေကြပါတယ်။
