Border News Agency
အမေရိကန်၊ ဧပြီ ၁၆။
အမေရိကန်နဲ့အီရန်ကြား ငြိမ်းချမ်းရေးဆွေးနွေးပွဲတွေ ပြန်စနိုင်ဖို့အတွက် ပါကစ္စတန် စစ်သေနာပတိချုပ် ဖီးလ်မာရှယ် အာဆင်မွန်နီယာ ဦးဆောင်တဲ့ ကိုယ်စားလှယ်အဖွဲ့ဟာ ဧပြီလ ၁၅ ရက်နေ့မှာ အီရန်နိုင်ငံ၊ တဟီရန်မြို့ကိုရောက်ရှိလာပါတယ်။
ဝါရှင်တန်ကပေးလိုက်တဲ့ သတင်းစကားအသစ်ကို ပါကစ္စတန်စစ်ဗိုလ်ချုပ်ကြီးကတစ်ဆင့် အီရန်အစိုးရဆီ ပေးအပ်မှာဖြစ်ပြီး ဒုတိယအကျော့ ဆွေးနွေးပွဲကျင်းပမယ့်အချိန်ကိုလည်း ညှိနှိုင်းသွားမှာပါ။
အမေရိကန်သမ္မတ ဒေါ်နယ်ထရမ့်ကတော့ လာမယ့် ၂ ရက်အတွင်း အခြေအနေတွေထူးခြားလာနိုင်ပြီး စစ်ပွဲဟာပြီးဆုံးခါနီးနေပြီလို့ အရိပ်အမြွက် ပြောကြားထားပါတယ်။
ပါကစ္စတန်ရဲ့ ကြားဝင်စေ့စပ်မှုဟာ အောင်မြင်ဖို့ နီးစပ်နေတယ်လို့လည်း သူကဆိုပါတယ်။
လက်ရှိမှာတော့ နှစ်ဖက်စလုံးက ဧပြီလ ၂၂ ရက်အထိ အပစ်ရပ်ထားဖို့ သဘောတူညီထားဆဲ ဖြစ်ပါတယ်။
တဖက်မှာလည်း အမေရိကန်ရေတပ်က ဟော်မုဇ်ရေလက်ကြားကို ပိတ်ဆို့ထားတာကြောင့် အီရန်ဆိပ်ကမ်းတွေကို ဘယ်သင်္ဘောမှ ဝင်ထွက်လို့မရဘူးလို့ အမေရိကန်ဗဟိုစစ်ဌာနချုပ်ကထုတ်ပြန်ပါတယ်။
အီရန်ဘက်ကတော့ ဒီပိတ်ဆို့မှုတွေသာ ဆက်ရှိနေရင် ပင်လယ်နီလမ်းကြောင်းကိုပါ ပိတ်ပစ်မယ်လို့ ပြန်လည်သတိပေးထားပါတယ်။
ဆွေးနွေးပွဲမှာ အဓိကညှိနှိုင်းရမယ့် အချက်တွေကတော့ အီရန်ရဲ့ နျူကလီးယားအစီအစဉ်၊ ဟော်မုဇ်ရေလက်ကြား ပြန်ဖွင့်ရေးနဲ့ စစ်ပွဲကြောင့် ပျက်စီးသွားတာတွေကို လျော်ကြေးပေးရေးတို့ ဖြစ်ပါတယ်။
အီရန်ဘက်ကတော့ လေဘနွန်မှာပါ အပစ်ရပ်ဖို့နဲ့ သူတို့ရဲ့ပိတ်မိနေတဲ့ ငွေကြေးတွေပြန်ထုတ်ပေးဖို့ကို အဓိကတောင်းဆိုနေပါတယ်။
စစ်ပွဲကြောင့် လေဘနွန်မှာ သေဆုံးသူ ၂,၁၀၀ ကျော်ရှိလာပြီး ကုလသမဂ္ဂကျွမ်းကျင်သူတွေကတော့ အစ္စရေးရဲ့ တိုက်ခိုက်မှုတွေဟာ နိုင်ငံတကာဥပဒေကို ချိုးဖောက်နေတာဖြစ်တယ်လို့ ပြင်းပြင်းထန်ထန် ဝေဖန်ရှုတ်ချထားပါတယ်။
