Border News Agency
နေပြည်တော်၊ ဧပြီ ၁၆။
မြန်မာနိုင်ငံမှာ စစ်အာဏာသိမ်းပြီးနောက် စစ်ကော်မရှင်ဟာ နည်းပညာတွေကိုဖိနှိပ်ရေးနဲ့ သတင်းမှားဖြန့်ဝေရေးအတွက် လက်နက်တခုလိုအသုံးချနေတယ်လို့ သံအမတ်ကြီးဦးကျော်မိုးထွန်းက ၅၉ ကြိမ်မြောက် ကုလသမဂ္ဂအစည်းအဝေးမှာ ပြောကြားလိုက်ပါတယ်။
အမျိုးသမီးသတင်းထောက်တွေနဲ့ တက်ကြွလှုပ်ရှားသူတွေကို အွန်လိုင်းကနေကိုယ်ရေးအချက်အလက်တွေဖြန့်ပြီး နှိမ့်ချစော်ကားနေသလို၊ အင်တာနက်ဖြတ်တောက်မှုတွေကြောင့် လူငယ်တွေရဲ့ပညာရေးနဲ့ အနာဂတ်တွေဆုံးရှုံးနေရတယ်လို့ ဆိုပါတယ်။
စစ်မှုထမ်းဥပဒေနဲ့ဖိနှိပ်မှုတွေကြောင့် လူငယ် ၅ သိန်းလောက် နိုင်ငံကနေ ထွက်ခွာသွားခဲ့ရတယ်လို့လည်း ထောက်ပြခဲ့ပါတယ်။
အဲဒီအပြင် စစ်ကော်မရှင်ဟာ AI နဲ့ မျက်နှာမှတ်သားတဲ့ နည်းပညာတွေသုံးပြီး CDM တွေနဲ့ တော်လှန်ရေးသမားတွေကို စောင့်ကြည့်ဖမ်းဆီးနေပါတယ်။
အဲဒီနည်းပညာတွေကို တခြားနိုင်ငံတွေဆီကနေ တင်သွင်းနေတာဖြစ်ပါတယ်။
စစ်ကော်မရှင်မှာ ငြိမ်းချမ်းရေးဖော်ဆောင်ဖို့ဆန္ဒမရှိဘဲ ဖျက်ဆီးရေးကိုပဲရွေးချယ်ထားတာကြောင့် စစ်အာဏာရှင်စနစ် အမြစ်ပြတ်ဖို့ကြိုးစားနေတဲ့ မြန်မာပြည်သူတွေနဲ့ SCEF ကောင်စီကို ထိရောက်တဲ့ပံ့ပိုးမှုတွေပေးဖို့ နိုင်ငံတကာကို တိုက်တွန်းခဲ့ပါတယ်။
