Border News Agency
အိန္ဒိယ၊ ဧပြီ ၁၆။
အိန္ဒိယနိုင်ငံ၊ မီဇိုရမ်ပြည်နယ်၊ ကိုလားဆစ်မြို့မှာ အိမ်ငှားနေထိုင်နေတဲ့ မြန်မာမိသားစုတစုဟာ အခန်းပိတ်ပြီး မီးဖိုလှုံရာကနေ အောက်ဆီဂျင်ပြတ်ကာ အသက် ၁၄ နှစ်အရွယ် မိန်းကလေးတဦး သေဆုံးသွားတယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီမိသားစုဟာ ဧပြီလ ၁၃ ရက်နေ့မှာ ပုံမှန်ဖွင့်နေကျလမ်းဘေးစားသောက်ဆိုင်ကိုမဖွင့်ခဲ့တဲ့အတွက် အိမ်နီးနားချင်းတွေက သွားရောက်ကြည့်ရှုရာကနေ အခုလိုတွေ့ရှိခဲ့တာပါ။
အဲဒီလို အခန်းတံခါးကိုဖျက်ဆီးပြီး ဝင်ရောက်ကြည့်ရှုတဲ့အခါမှာတော့ အသက် ၃၅ နှစ်အရွယ် မိခင်နဲ့ ၁၁ နှစ်အရွယ် သားဖြစ်သူတို့ဟာ သတိလစ်နေပြီး ၁၄ နှစ်အရွယ် သမီးဖြစ်သူကတော့ သေဆုံးတယ်လို့ဆိုပါတယ်။
အဲဒီအပြင်ညပိုင်းအအေးဒဏ်ကြောင့် အခန်းထဲမှာတံခါးနဲ့ ပြတင်းပေါက်တွေအကုန်ပိတ်ပြီး မီးဖိုလှုံခဲ့ရာကနေထွက်လာတဲ့မီးခိုးတွေကြောင့် အောက်ဆီဂျင်ပြတ်တောက်ပြီး အသက်ရှူကျပ်သွားတာလို့ ရဲတပ်ဖွဲ့ကယူဆထားပါတယ်။
အဲဒီသတိလစ်နေသူနှစ်ဦးကို ဆေးရုံမှာ အရေးပေါ်ကုသပေးနေရသလို သေဆုံးသူမိန်းကလေးရဲ့ ရုပ်အလောင်းကိုလည်း ရင်ခွဲစစ်ဆေးဖို့ ပို့ဆောင်ထားပါတယ်။
ဒီဖြစ်ရပ်ကြောင့် ကိုလားဆစ်မြို့ရောက် မြန်မာစစ်ရှောင်မိသားစုတွေနဲ့ ဒေသခံတွေကြားမှာ စိတ်မကောင်းဖြစ်ရသလို အခုလိုရာသီမှာ အခန်းအောင်းပြီးမီးလှုံတာတွေနဲ့ ပတ်သက်လို့လည်းသတိပေးမှုတွေ ရှိနေပါတယ်။
