Border News Agency
အမေရိကန်၊ ဧပြီ ၁၆။
အမေရိကန်နဲ့ အီရန်ကြား အပစ်အခတ်ရပ်စဲထားပေမယ့် အီရန်အပေါ် ဖိအားပေးဖို့အတွက် အရှေ့အလယ်ပိုင်းဒေသကို အမေရိကန်တပ်ဖွဲ့ဝင် ၁၀,၀၀၀ ကျော် ထပ်မံစေလွှတ်လိုက်တယ်လို့ The Washington Post သတင်းမှာ ဖော်ပြထားပါတယ်။
ဧပြီလကုန်မှာ ရောက်ရှိလာမယ့် ဒီတပ်ဖွဲ့ဝင်တွေထဲမှာ လေယာဉ်တင်သင်္ဘော USS George HW Bush နဲ့ မရိန်းတပ်သားတွေ ပါဝင်ပါတယ်။
အခုထပ်တိုးလိုက်တဲ့ တပ်ဖွဲ့ဝင်တွေကြောင့် အရှေ့အလယ်ပိုင်းမှာရှိတဲ့ အမေရိကန်လေယာဉ်တင်သင်္ဘော ၃ စင်းအထိ ရှိလာမှာပါ။
ဒါဟာ အီရန်နဲ့ ငြိမ်းချမ်းရေးဆွေးနွေးနေရင်း တဖက်မှာလည်း လိုအပ်ရင် စစ်ရေးအရ တိုက်ခိုက်မှုတွေ၊ မြေပြင်စစ်ဆင်ရေးတွေလုပ်ဖို့ အသင့်ပြင်ထားတာလို့ အရာရှိတွေကဆိုပါတယ်။
အမေရိကန်ဗဟိုစစ်ဌာနချုပ်ကတော့ အီရန်ဆိပ်ကမ်းတွေကို ပင်လယ်ရေကြောင်းကနေ ပိတ်ဆို့တာ အောင်မြင်နေပြီး ကုန်သွယ်ရေးသင်္ဘောအားလုံးကို အပြီးအပိုင် တားဆီးထားနိုင်ပြီလို့ ထုတ်ပြန်ပါတယ်။
ဒါပေမယ့် သင်္ဘောအချို့ဟာ ပိတ်ဆို့မှုကို ကျော်ဖြတ်ပြီး ဟော်မုဇ်ရေလက်ကြားကနေ ထွက်ခွာနိုင်ခဲ့တယ်လို့လည်း သတင်းအချို့မှာ ဖော်ပြနေပါတယ်။
သမ္မတဒေါ်နယ်ထရမ့်ကတော့ လာမယ့် ၂ ရက်အတွင်း ပါကစ္စတန်မှာ အီရန်နဲ့ ဆွေးနွေးပွဲတွေ ထပ်လုပ်နိုင်ခြေရှိတယ်လို့ ပြောထားပါတယ်။
ပြီးခဲ့တဲ့အပတ်က ဆွေးနွေးပွဲမှာ သဘောတူညီမှု မရခဲ့ပေမယ့် လက်ရှိအပစ်ရပ်ထားမှုဟာ ဧပြီ ၂၂ ရက်အထိ ဆက်ရှိနေဦးမှာပါ။
တဖက်မှာလည်း အီရန်နဲ့ စစ်ပွဲအတွင်း အမေရိကန်ကို အပြည့်အဝပံ့ပိုးမှုမပေးတဲ့ အီတလီဝန်ကြီးချုပ်မီလိုနီကို သမ္မတထရမ့်က လူသိရှင်ကြား ပြင်းပြင်းထန်ထန် ဝေဖန်ရှုတ်ချလိုက်တာကြောင့် ဥရောပမဟာမိတ်တွေကြားမှာလည်း တင်းမာမှုတွေဖြစ်ပေါ်နေပါတယ်။
