Border News Agency
ပေါက်၊ ဧပြီ ၁၆။
အတာသင်္ကြန်အတက်နေ့ဖြစ်တဲ့ ဒီနေ့၊ နေ့လည်၂ နာရီခွဲအချိန်မှာ မကွေးတိုင်း၊ ပေါက်မြို့နယ်၊ ဝန်လဲကျေးရွာကို စစ်ကော်မရှင်တပ်က လေကြောင်းတိုက်ခိုက်ခဲ့တာကြောင့် ဒေသခံ ၂ ဦး သေဆုံးသွားပါတယ်။
အဲဒီမိတ္ထီလာရှမ်းတဲစခန်းက တက်လာတဲ့တိုက်လေယာဥ်ဟာ အိမ်ခြေ ၅၀ သာရှိတဲ့ ဝန်လဲရွာလယ်တည့်တည့်ကို ပေါင် ၅၀၀ ဗုံးနဲ့တိုက်ခိုက်ခဲ့တာဖြစ်ပြီး ရွာသားတွေဟာ ပျော်ပွဲရွှင်ပွဲလုပ်နေတာမရှိဘူးလို့ သိရပါတယ်။
အဲဒီတိုက်ခိုက်မှုကြောင့် နေရာမှာတင် ၂ ဦး သေဆုံးခဲ့ရသလို နောက်ထပ် ဒေသခံ ၅ ဦး ဒဏ်ရာရရှိခဲ့ပါတယ်။
အဲဒီဒဏ်ရာရသူတွေထဲက ၂ ဦးကတော့ အခြေအနေစိုးရိမ်ရတယ်လို့ ပေါက်မြို့နယ် ပအဖ အဖွဲ့ကဆိုပါတယ်။
အဲဒီအပြင် ကျေးရွာအတွင်းကအရပ်သားနေအိမ် ၆ လုံးလည်း ပျက်စီးဆုံးရှုံးခဲ့ရတယ်လို့ဆိုပါတယ်။
NUG လူသားချင်းစာနာရေးဝန်ကြီးဌာနကလည်း အပြစ်မဲ့ပြည်သူတွေအပေါ် ပစ်မှတ်ထားတဲ့ စစ်ကော်မရှင်တပ်ရဲ့ ဒီလုပ်ရပ်နဲ့ပတ်သက်ပြီး ထိခိုက်ပျက်စီးမှု အခြေအနေတွေကို ဆက်လက်အတည်ပြုနေတယ်လို့ဆိုပါတယ်။
