Border News Agency
မိုးမိတ်၊ ဧပြီ ၁၆။
တရားမဝင်သမ္မတတုမင်းအောင်လှိုင်ကို TNLA သင်္ကြန်ဆုတောင်းလွှာပေးပို့ခဲ့တဲ့အပေါ် တအာင်းအရပ်ဘက်အဖွဲ့အစည်းများကွန်ရက် (TCSN) က ဧပြီလ ၁၆ ရက်၊ ဒီနေ့မှာ ပြင်းပြင်းထန်ထန် ကန့်ကွက်လိုက်ပါတယ်။
ဒီလုပ်ရပ်ဟာ တအာင်းအရပ်ဘက်အဖွဲ့အစည်းတွေနဲ့ တအာင်းပြည်သူလူထုတရပ်လုံးရဲ့ နိုင်ငံရေးမျှော်မှန်းချက်၊ ရပ်တည်ချက်တွေနဲ့ လုံးဝဆန့်ကျင်နေတယ်လို့ဆိုပါတယ်။
မင်းအောင်လှိုင်ဟာ နိုင်ငံတော်အတိုင်ပင်ခံပုဂ္ဂိုလ် အပါအဝင် နိုင်ငံရေးခေါင်းဆောင်တွေကို မတရားဖမ်းဆီးထားသလို ပြည်သူတွေကိုလည်း နေ့စဉ်သတ်ဖြတ်နေသူဖြစ်တယ်လို့ ဆိုပါတယ်။
TNLA ခေါင်းဆောင်ပိုင်းအနေနဲ့ လက်ရှိရင်ဆိုင်နေရတဲ့ စစ်ရေး၊ နိုင်ငံရေး အကျပ်အတည်းတွေကို နားလည်ပေးနိုင်ပေမဲ့ အခုလိုဆုတောင်းလွှာပေးပို့တာဟာ TNLA ရဲ့ သီးသန့်ရပ်တည်ချက်သာဖြစ်ပြီး ပြည်သူတွေရဲ့ သဘောထားမဟုတ်ဘူးလို့ အသိပေးထားပါတယ်။
ဒါကြောင့် TNLA အနေနဲ့ လက်ရှိတအာင်းဒေသမှာ တာဝန်ထမ်းဆောင်နေတဲ့ CDM တွေ၊ တော်လှန်ရေးမှာ အသက်ပေးသွားတဲ့ သူရဲကောင်းတွေနဲ့ ပြည်သူလူထုရဲ့ မျက်နှာကို ထောက်ထားပြီး တော်လှန်ရေးလမ်းကြောင်းပေါ်မှာ ခိုင်ခိုင်မာမာ ပြန်လည်ရပ်တည်ပေးဖို့ တောင်းဆိုထားပါတယ်။
ဒါ့အပြင် စစ်ကော်မရှင်တပ်နဲ့ ပူးပေါင်းဆောင်ရွက်တာ၊ ဂုဏ်ပြုတာတွေကို ချက်ချင်းရပ်တန့်ဖို့နဲ့ ပြည်သူလူထုရဲ့ ယုံကြည်မှုကို ပြန်လည်တည်ဆောက်ဖို့လည်း တိုက်တွန်းထားပါတယ်။
TCSN အနေနဲ့ ဖက်ဒရယ်ဒီမိုကရေစီနိုင်ငံပေါ်ထွန်းတဲ့အထိ တော်လှန်ပြည်သူတွေနဲ့အတူ လက်တွဲသွားမယ်လို့ အတည်ပြုပြောကြားထားပါတယ်။
