Border News Agency
အီရန်၊ဧပြီ ၂၂။
အမေရိကန်သမ္မတ ဒေါ်နယ်ထရန့်ရဲ့ အပစ်အခတ်ရပ်စဲရေး သက်တမ်းတိုးလိုက်တဲ့ လုပ်ရပ်ဟာ အီရန်ကိုအလစ်ငိုက် တိုက်ခိုက်နိုင်ဖို့အတွက် အချိန်ဆွဲတဲ့ ပရိယာယ်တခုသာဖြစ်တယ်လို့ အီရန်ထိပ်တန်းညှိနှိုင်းရေးမှူးရဲ့ အကြံပေးက ဧပြီလ ၂၁ ရက်နေ့မှာ ဝေဖန်လိုက်ပါတယ်။
အမေရိကန်ကအီရန်ဆိပ်ကမ်းတွေကို ဆက်ပြီးပိတ်ဆို့ထားတာဟာ ဗုံးကြဲတိုက်ခိုက်တာနဲ့ ဘာမှမခြားနားဘဲ ဒါကို စစ်ရေးအရ တုံ့ပြန်ရမယ်လို့လည်း အီရန်လွှတ်တော်ဥက္ကဋ္ဌရဲ့ အကြံပေးက X လူမှုကွန်ယက်မှာ ရေးသားထားတာပါ။
အီရန်ဘက်ကတော့ ထရန့်ရဲ့ အပစ်ရပ်ရေးကမ်းလှမ်းမှုကို မယုံကြည်သလို အမေရိကန်ရဲ့ ရေကြောင်းပိတ်ဆို့မှုတွေကြောင့် သူတို့ရဲ့ စီးပွားရေးနဲ့ စွမ်းအင်ကဏ္ဍတွေ အကြီးအကျယ် ထိခိုက်နေရတာကို လက်မခံနိုင်ဖြစ်နေပါတယ်။
လက်ရှိမှာ အမေရိကန်-အစ္စရေးနဲ့ အီရန်ကြား စစ်မီးက ပိုပြီးပြင်းထန်လာနေပြီး ပါကစ္စတန်က ကြားဝင်ညှိနှိုင်းပေးနေပေမယ့် နှစ်ဖက်စလုံးက စစ်ရေးအရ အသင့်အနေအထားမှာပဲ ရှိနေကြတာပါ။
ဒါ့အပြင် အီရန်ဘက်ကလည်း အစ္စရေးအတွက် သူလျှိုလုပ်ပေးတယ်လို့ စွပ်စွဲခံရသူတဦးကို ဒီနေ့မှာပဲ ကွပ်မျက်လိုက်သလို ဟစ်ဇဘိုလာအဖွဲ့ကလည်း အစ္စရေးဘက်ကို ပစ်ခတ်မှုတွေရှိနေတာကြောင့် အပစ်ရပ်ရေးဟာ ပျက်ပြားဖို့ ပိုနီးစပ်နေပါတယ်။
