Border News Agency
အမေရိကန်၊ဧပြီ ၂၄။
အမေရိကန်နဲ့ အီရန်တို့ကြား ဟော်မုဇ်ရေလက်ကြားမှာ စစ်ရေးတင်းမာမှုတွေ ပြင်းထန်လာတာကြောင့် ကမ္ဘာ့ရေနံဈေးနှုန်းဟာ ဧပြီလ ၁၇ ရက်နေ့ကတည်း တစည်ကို ၁၀၆ ဒေါ်လာအထက်အထိ သိသိသာသာ ထိုးတက်သွားတယ်လို့ အယ်လ်ဂျာဇီးယားသတင်းမှာ ဖော်ပြထားပါတယ်။
နိုင်ငံတကာရေနံဈေးကွက်ရဲ့ စံနှုန်းဖြစ်တဲ့ Brent crude ရေနံဈေးဟာ ၅ ရာခိုင်နှုန်းနီးပါး မြင့်တက်ခဲ့တာဖြစ်ပြီး ဒါဟာ နှစ်ပတ်အတွင်း ပထမဆုံးအကြိမ်အဖြစ် တစည်ကို ဒေါ်လာ ၁၀၀ ကျော်အထိ ပြန်လည်ရောက်ရှိလာတာလည်း ဖြစ်ပါတယ်။
ကမ္ဘာ့ရေနံနဲ့ သဘာဝဓာတ်ငွေ့ ငါးပုံတစ်ပုံခန့် ဖြတ်သန်းရာ ဟော်မုဇ်ရေလက်ကြားမှာ အမေရိကန်ရေတပ်က ပိတ်ဆို့မှုတွေ လုပ်ဆောင်နေသလို အီရန်ဘက်ကလည်း သင်္ဘောတွေကို ဝင်ရောက်စီးနင်းတာတွေ လုပ်ဆောင်နေတာကြောင့် ရေကြောင်းကုန်သွယ်မှုတွေ ရပ်တန့်လုနီးပါး ဖြစ်နေပါတယ်။
သမ္မတ ဒေါ်နယ်ထရန့်ကတော့ ဟော်မုဇ်ရေလက်ကြားကို အမေရိကန်ရေတပ်က အသေအချာ ထိန်းချုပ်ထားပြီဖြစ်လို့ အီရန်နဲ့ သဘောတူညီချက်အသစ် မရမချင်း ဘယ်သင်္ဘောမဆို အမေရိကန်ရဲ့ ခွင့်ပြုချက်မပါဘဲ ဖြတ်သန်းခွင့်ပြုမှာမဟုတ်ဘူးလို့ ပြောဆိုထားပါတယ်။
စစ်ပွဲမစတင်မီက တရက်ကို ပျမ်းမျှသင်္ဘောအစီးရေ ၁၃၀ နီးပါး ဖြတ်သန်းခဲ့တဲ့ အဲဒီရေလက်ကြားမှာ ဧပြီလ ၂၂ ရက်နေ့က သင်္ဘော ၉ စီးသာ ဖြတ်သန်းနိုင်ခဲ့ပြီး အခုလို ကုန်သွယ်ရေးလမ်းကြောင်း ပြတ်တောက်မှုတွေကြောင့် ကမ္ဘာ့စီးပွားရေးအပေါ် စိုးရိမ်မှုတွေ မြင့်တက်နေပါတယ်။
