Border News Agency
လက်ဘနွန်၊ မေ ၂။
လက်ဘနွန်တောင်ပိုင်းရှိ မြို့အတော်များများကို အစ္စရေးကဒရုန်း၊ တိုက်လေယာဉ်တွေအသုံးပြုပြီး ဗုံးကြဲတိုက်ခိုက်ခဲ့တာကြောင့် အနည်းဆုံး လူ ၁၀ ဦး သေဆုံးသွားတယ်လို့ လက်ဘနွန်အမျိုးသားသတင်းဌာန (NNA) က မေလ ၁ ရက်၊ မနေ့ကထုတ်ပြန်ပါတယ်။
ဧပြီလ ၁၇ ရက်နေ့ကတည်းက အပစ်အခတ်ရပ်စဲရေး ကြေညာထားပေမယ့် အစ္စရေးဘက်က နာဗာတီရ်ခရိုင်အတွင်းရှိ ကားတစီးနဲ့ နေအိမ်တွေကို ပစ်မှတ်ထားတိုက်ခိုက်ခဲ့တာကြောင့် အခုလို သေဆုံးမှုတွေ ထပ်မံရှိလာတာပါ။
အစ္စရေးဘက်ကတော့ ဟစ်ဇ်ဘိုလာအဖွဲ့ကို ပစ်မှတ်ထားတာလို့ ဆိုထားပေမယ့် သေဆုံးသူအများစုဟာ အရပ်သားတွေဖြစ်နေပြီး ပြီးခဲ့တဲ့နှစ်ရက်အတွင်း တိုက်ခိုက်မှုကြောင့် လူ ၄၄ ဦးထက်မနည်း သေဆုံးခဲ့ပါတယ်။
တဖက်မှာလည်း ဟစ်ဇ်ဘိုလာအဖွဲ့က လက်ဘနွန်ပိုင်နက်အတွင်း ဝင်ရောက်နေတဲ့ အစ္စရေးစစ်ကြောင်းတွေကိုဒရုန်းတွေ၊ ဒုံးကျည်တွေနဲ့ ဆက်လက်တိုက်ခိုက်သွားမယ်လို့ ကတိပြုထားပြီး အစ္စရေးစစ်သား ၃ ဦး သေဆုံးခဲ့တယ်လို့ ဆိုပါတယ်။
ပြီးခဲ့တဲ့ မတ်လကတည်းက စတင်ခဲ့တဲ့ အစ္စရေးနဲ့ လက်ဘနွန်စစ်ပွဲကြောင့် လက်ရှိအချိန်ထိ လူပေါင်း ၂,၆၀၀ ကျော် သေဆုံးခဲ့ရပြီး လူပေါင်း ၁ သန်းကျော်ဟာလည်း နေရပ်စွန့်ခွာ ထွက်ပြေးနေရပါတယ်။
