Border News Agency
မြောက်ဦး၊ မေ ၄။
မြန်မာနိုင်ငံအတွင်း မုတ်သုံလေမဝင်ခင် မေလဟာ မိုးကြိုကာလဖြစ်တာကြောင့် ဖြစ်ပေါ်လာနိုင်တဲ့ မိုးလေဝသအန္တရာယ်တွေကို အထူးဂရုပြုကြဖို့ မိုးလေဝသနဲ့ဇလဗေဒညွှန်ကြားမှုဦးစီးဌာနက မေလ ၃ ရက်၊မနေ့ကအသိပေးထုတ်ပြန်ပါတယ်။
အခုရက်ပိုင်းမှာ နေ့အပူချိန်တွေ တဖြည်းဖြည်းမြင့်တက်လာရာကနေ လေထုမငြိမ်မသက်ဖြစ်ပြီး မွန်းလွဲပိုင်းနဲ့ ညနေပိုင်းတွေမှာ မိုးတိမ်တောင်တွေ ဖြစ်ထွန်းလာနိုင်တာကြောင့် လေပြင်းတွေ တိုက်ခတ်နိုင်တယ်လို့ ဆိုပါတယ်။
အဲဒီလို လေပြင်းတိုက်ခတ်ချိန်မှာ မြေပြင်နဲ့ ရေပြင်လေဟာ တနာရီကို မိုင် ၄၀ ကနေ ၅၀ အထိ အရှိန်ပြင်းနိုင်သလို မိုးကြိုးပစ်တာ၊ လျှပ်စီးလက်တာနဲ့ မိုးသီးကြွေတာမျိုးတွေလည်း ဖြစ်ပေါ်နိုင်တယ်လို့ သတိပေးထားပါတယ်။
ဒါ့အပြင် နေရာကွက်ကျား မိုးထစ်ချုန်းရွာတာတွေလည်း ရှိနိုင်တာကြောင့် ခရီးသွားလာမယ့် ပြည်တွင်းလေကြောင်းပျံသန်းရေးနဲ့ ရေကြောင်းခရီးစဉ်တွေအနေနဲ့ ကြိုတင်သတိပြုကြဖို့ နှိုးဆော်ထားတာပါ။
ဒါကြောင့် ပြည်သူတွေအနေနဲ့ မိုးသက်လေပြင်းတိုက်ခတ်ချိန်မှာ သစ်ပင်ကြီးတွေ၊ဓာတ်တိုင်တွေအနီး နေထိုင်တာမျိုး ရှောင်ကြဉ်ကြဖို့နဲ့ မိုးလေဝသသတင်းတွေကို အမြဲမပြတ် နားစွင့်ထားကြဖို့ တိုက်တွန်းထားပါတယ်။
