Border News Agency
အီရန်၊ မေ ၇။
အမေရိကန်ရဲ့ ခြိမ်းခြောက်မှုတွေ အဆုံးသတ်သွားပြီဖြစ်လို့ ဟော်မုဇ်ရေလက်ကြားကို လုပ်ထုံးလုပ်နည်းအသစ်တွေနဲ့ ဘေးကင်းအောင် ပြန်ဖွင့်ပေးမယ်လို့ အီရန်တော်လှန်ရေးအစောင့်တပ် (IRGC) ရေတပ်က မေလ ၆ ရက်၊မနေ့ကထုတ်ပြန်လိုက်ပါတယ်။
အမေရိကန်ဘက်က Project Freedom စစ်ဆင်ရေးကို ရပ်နားလိုက်ပြီးနောက်မှာ အခုလို ပြောဆိုလာတာပါ။
သမ္မတထရမ့်ကတော့ အီရန်ဘက်က သဘောတူညီချက်အတိုင်း လုပ်ဆောင်မယ်ဆိုရင် စစ်ပွဲကို အဆုံးသတ်မှာဖြစ်ပြီး ရေလက်ကြားကိုလည်း အားလုံးအတွက် ပြန်ဖွင့်ပေးမယ်လို့ ဆိုပါတယ်။
ဒါပေမယ့် အီရန်ဘက်က သဘောမတူရင်တော့ အရင်ကထက် ပိုပြင်းထန်တဲ့ ဗုံးကြဲတိုက်ခိုက်မှုတွေ လုပ်မယ်လို့လည်း သတိပေးထားပါတယ်။
အီရန်ဘက်က ရေလက်ကြားကို အမြဲတမ်း စီမံခန့်ခွဲသွားမယ့် Persian Gulf Strait Authority ဆိုတဲ့ အဖွဲ့အသစ်တခုကိုလည်း ဖွဲ့စည်းလိုက်ပါတယ်။
ဒါဟာ ရေလက်ကြားရဲ့ အခြေအနေကို အပြီးတိုင် ပြောင်းလဲပစ်ဖို့ ကြိုးစားတာလို့ အကဲခတ်တွေက သုံးသပ်နေကြပါတယ်။
ရေလက်ကြား ပိတ်ထားရတာကြောင့် ပင်လယ်ကွေ့နိုင်ငံတွေဟာ တရက်ကို ဒေါ်လာသန်း ၇၀၀ လောက် ဆုံးရှုံးနေရတယ်လို့ Goldman Sachs ရဲ့ အချက်အလက်တွေအရ သိရပါတယ်။
အဲဒီပြင်သစ်ကုန်တင်သင်္ဘောတစီး မေလ ၅ ရက်နေ့က တိုက်ခိုက်ခံခဲ့ရတာကြောင့် ရေလက်ကြားအတွင်း အန္တရာယ်တွေ ရှိနေဆဲ ဖြစ်ပါတယ်။
လက်ရှိမှာတော့ အမေရိကန်ရဲ့ ကမ်းလှမ်းချက်ကို အီရန်ဘက်က ပြန်လည်သုံးသပ်နေပြီး ပါကစ္စတန်ဝန်ကြီးချုပ် ရှာဘတ်ရှရစ်ဖ်ကလည်း ဒီငြိမ်းချမ်းရေးကြိုးပမ်းမှုတွေအပေါ် ကျေးဇူးတင်ကြောင်း ပြောကြားထားပါတယ်။
ဒေသတွင်း တည်ငြိမ်ရေးအတွက် ဒီဆွေးနွေးမှုတွေက အရေးပါတဲ့ အပြောင်းအလဲ ဖြစ်လာနိုင်ပါတယ်။
