Border News Agency
ဖိလစ်ပိုင်၊ မေ ၁၃။
မြန်မာ့ငြိမ်းချမ်းရေးနဲ့ပြန်လည်သင့်မြတ်ရေးအတွက် ဒေါ်အောင်ဆန်းစုကြည်အနေနဲ့ အမျိုးသားခေါင်းဆောင်တဦးအဖြစ် သူမရဲ့တရားဝင်အခန်းကဏ္ဍကနေပါဝင်ဆောင်ရွက်ခွင့်ရှိတယ်လို့ အာဆီယံဥက္ကဋ္ဌ ဖိလစ်ပိုင်သမ္မတမားကို့စ်ဂျူနီယာက ပြောလိုက်ပါတယ်။
ဒါဟာရန်ကုန်ဖက်ဒရယ်ယူနစ်လွှတ်တော်က နိုင်ငံတကာကိုပေးပို့ခဲ့တဲ့စာအပေါ် အာဆီယံဘက်ကပြန်လည်တုံ့ပြန်လိုက်တာလည်း ဖြစ်ပါတယ်။
အာဆီယံဥက္ကဋ္ဌရဲ့အထူးကိုယ်စားလှယ်က ပေးပို့တဲ့စာမှာတော့ နိုင်ငံရေးအကျဉ်းသားတွေကိုလွှတ်ပေးဖို့ သံတမန်ရေးအရ အခိုင်အမာတောင်းဆိုနေကြောင်းနဲ့ ဒါဟာငြိမ်းချမ်းရေးအတွက် အရေးကြီးဆုံးခြေလှမ်းဖြစ်ကြောင်း ဖော်ပြထားပါတယ်။
ဒါ့အပြင်အာဆီယံရဲ့ ဘုံသဘောတူညီချက် ၅ ချက်အတိုင်း တွေ့ဆုံဆွေးနွေးရေးနဲ့ အကူအညီပေးရေးတွေကို ဆက်ပြီးကြိုးပမ်းသွားမယ်လို့ဆိုပါတယ်။
အာဏာသိမ်းစစ်တပ်က ကျင်းပခဲ့တဲ့ရွေးကောက်ပွဲတွေကိုတော့ အာဆီယံအဖွဲ့အတွင်းမှာ အသိအမှတ်ပြုဖို့ သဘောတူညီချက်မရရှိခဲ့ပါဘူး။
အကြမ်းဖက်မှုတွေဆက်ရှိနေပြီး ဘုံသဘောတူညီချက်တွေကို အပြည့်အဝမလိုက်နာရင် အဲဒီရွေးကောက်ပွဲကို လက်ခံဖို့ခဲယဉ်းလိမ့်မယ်လို့လည်း အာဆီယံကသတိပေးထားပါတယ်။
ရန်ကုန်ဖက်ဒရယ်ယူနစ်လွှတ်တော် ဥက္ကဋ္ဌကလည်း အာဆီယံရဲ့ အခုလိုကြိုးပမ်းမှုတွေနဲ့ ဒေါ်အောင်ဆန်းစုကြည်နဲ့တွေ့ဆုံနိုင်ဖို့ လုပ်ဆောင်နေတာတွေအပေါ် ကျေးဇူးတင်ကြောင်းပြောပါတယ်။
မိမိတို့အနေနဲ့ အာဏာသိမ်းစစ်တပ်ကိုတရားမဝင်အစိုးရလို့ရှုမြင်ပေမယ့် အာဆီယံက ဆက်သွယ်ဆောင်ရွက်နေတာတွေကိုတော့ နားလည်တယ်လို့ဆိုပါတယ်။
အခုလိုအာဆီယံနဲ့ နိုင်ငံတကာကအကြောင်းပြန်လာတာဟာ ဖက်ဒရယ်ယူနစ်လွှတ်တော်တွေရဲ့ သံတမန်ရေးရာအခန်းကဏ္ဍမြင့်မားလာတာကို ပြသနေတာဖြစ်တယ်လို့ဆိုပါတယ်။
