Border News Agency
အမေရိကန်၊ မေ ၁၃။
ကမ္ဘာ့အရေးအပါဆုံးရေကြောင်းလမ်းဖြစ်တဲ့ ဟော်မုဇ်ရေလက်ကြားမှာ လွတ်လပ်စွာသွားလာခွင့်ရဖို့နဲ့ အီရန်ရဲ့တိုက်ခိုက်မှုတွေ ရပ်တန့်ဖို့ ဘာရိန်းနဲ့အမေရိကန်တို့ဦးဆောင်တင်သွင်းတဲ့ ကုလသမဂ္ဂဆုံးဖြတ်ချက်မူကြမ်းကို နိုင်ငံပေါင်း ၁၁၂ ခုက ထောက်ခံ လက်မှတ်ရေးထိုးလိုက်ကြပါတယ်။
အဲဒီအထဲမှာ ကာတာ၊ ဆော်ဒီအာရေဗျတို့လို ဒေသတွင်းနိုင်ငံတွေအပြင် အိန္ဒိယ၊ ဂျပန်နဲ့ ဥရောပသမဂ္ဂအဖွဲ့ဝင်နိုင်ငံအများစုလည်း ပါဝင်နေတာပါ။
အဲဒီဆုံးဖြတ်ချက်ဟာ နိုင်ငံတကာရေကြောင်းလမ်းတွေနဲ့ စွမ်းအင်တင်ပို့မှုလုံခြုံရေးအတွက် ရည်ရွယ်တာဖြစ်ပြီး အရင်လကတင်သွင်းခဲ့စဉ်မှာတော့ တရုတ်နဲ့ရုရှားတို့က ဗီတိုအာဏာသုံးပြီးပယ်ချခဲ့ဖူးပါတယ်။
အခုတကြိမ်မှာလည်း အဲဒီနှစ်နိုင်ငံကကန့်ကွက်မှုတွေ ရှိနေသေးသလို ဘယ်နေ့မှာမဲခွဲဆုံးဖြတ်မလဲဆိုတာကိုတော့ မသိရသေးပါဘူး။
လက်ရှိမှာအမေရိကန်နဲ့ အီရန်ကြား ငြိမ်းချမ်းရေးဆွေးနွေးမှုတွေက ရှေ့မတိုးနိုင်ဘဲဖြစ်နေပါတယ်။
အမေရိကန်က အီရန်ရဲ့ နျူကလီးယားအစီအစဉ်ကို ဖျက်သိမ်းဖို့တောင်းဆိုနေပြီး အီရန်ဘက်ကတော့ အမေရိကန်ရဲ့ ရေကြောင်းပိတ်ဆို့မှုတွေကို ရပ်တန့်ပေးဖို့နဲ့ စစ်လျော်ကြေးပေးဖို့ အပြန်အလှန်တောင်းဆိုနေကြတာပါ။
အီရန်ဒုတိယနိုင်ငံခြားရေးဝန်ကြီးကတော့ အမေရိကန်ဟာ ငြိမ်းချမ်းရေးထက် အညံ့ခံဖို့ကိုပဲရှာဖွေနေတယ်လို့ ဝေဖန်ထားပါတယ်။
တဖက်မှာလည်း တူရကီနဲ့ ကာတာခေါင်းဆောင်တွေက ရေလက်ကြားကို လက်နက်သဖွယ်အသုံးမပြုဖို့ သတိပေးထားသလို ပါကစ္စတန်ရဲ့ ကြားဝင်စေ့စပ်ပေးမှုတွေကိုလည်း ထောက်ခံနေကြပါတယ်။
အခုလိုစစ်ပွဲနဲ့ စွမ်းအင်ပြတ်တောက်မှုတွေကြောင့် အမေရိကန်မှာ ကုန်စျေးနှုန်းတွေတက်လာနေပေမယ့် သမ္မတထရန့်ကတော့ အီရန်ကို နျူကလီးယားလက်နက်မရစေဖို့ကသာ သူတို့ရဲ့ပထမဦးစားပေးဖြစ်တယ်လို့ပြောဆိုထားပါတယ်။
လက်ရှိမှာ ထရန့်ဟာ စစ်ပွဲကိစ္စဆွေးနွေးဖို့အတွက် တရုတ်နိုင်ငံကို ရောက်ရှိနေတာလည်းဖြစ်ပါတယ်။
