Border News Agency
ရန်ကုန်၊ မေ ၁၉။
ပြည်တွင်းပဋိပက္ခတွေနဲ့ ကမ္ဘာလုံးဆိုင်ရာလောင်စာပြတ်လပ်မှုတွေ ရင်ဆိုင်နေရတဲ့အာရက္ခဒေသအပါအဝင် မြန်မာတနိုင်ငံလုံးမှာ လာမယ့် ၂၀၂၇ ခုနှစ်အတွင်း စားနပ်ရိက္ခာအကျပ်အတည်း ပိုမိုဆိုးရွားလာနိုင်တယ်လို့ ကမ္ဘာ့စားနပ်ရိက္ခာအစီအစဉ် (WFP) က မေလ ၁၈ ရက်နေ့က ထုတ်ပြန်ပါတယ်။
အဲဒီမြေဩဇာဈေးနှုန်းမြင့်တက်မှုကြောင့် တောင်သူတွေ မြေဩဇာသုံးစွဲမှု ၅၀ ရာခိုင်နှုန်း လျော့နည်းလာနေပြီး ဒါဟာတနိုင်ငံလုံး စိုက်ပျိုးထုတ်လုပ်မှု ၁၅ ရာခိုင်နှုန်းအထိ ကျဆင်းသွားစေနိုင်တယ်လို့ ထောက်ပြထားပါတယ်။
အဲဒီလိုစိုက်ပျိုးထုတ်လုပ်မှု ကျဆင်းတာက ကုန်ဈေးနှုန်းတွေကို ထပ်မံမြင့်တက်စေမှာဖြစ်ပြီး အနာဂတ်အကျပ်အတည်းကို ပိုမိုတွန်းအားပေးသလို ဖြစ်စေတယ်လို့ ဆိုပါတယ်။
မြန်မာနိုင်ငံရှိ ဥရောပသမဂ္ဂရဲ့ လူသားချင်းစာနာထောက်ထားမှုဆိုင်ရာအစီအစဉ်တွေကို ကြီးကြပ်နေသူ Ms. Jessica Chaix ကလည်း ကမ္ဘာလုံးဆိုင်ရာ လောင်စာဈေးနှုန်းမြင့်တက်မှုကြောင့် နဂိုကတည်းက ရုန်းကန်နေရတဲ့ သန်းနဲ့ချီတဲ့ပြည်သူတွေဟာ အခြေခံလိုအပ်ချက်တွေကိုတောင် လက်လှမ်းမီဖို့ပိုမိုခက်ခဲလာနေတယ်လို့ ဆိုပါတယ်။
မြန်မာနိုင်ငံမှာ လူဦးရေ ၁၂ ဒသမ ၄ သန်း (လူဦးရေ ၄ ယောက်မှာ ၁ ယောက်နှုန်း)ဟာ ပြင်းထန်တဲ့ဆာလောင်မွတ်သိပ်မှုဒဏ်ကို ရင်ဆိုင်နေရပြီဖြစ်ပါတယ်။
ပြီးခဲ့တဲ့ဖေဖော်ဝါရီလနှောင်းပိုင်းကစလို့ တနိုင်ငံလုံးအတိုင်းအတာနဲ့ အခြေခံစားသောက်ကုန်ဈေးနှုန်းတွေ ၁၈ ရာခိုင်နှုန်းအထိ မြင့်တက်ခဲ့ပြီး ဝင်ငွေနဲ့အလုပ်အကိုင်နည်းပါးတဲ့ မိသားစုတွေအတွက် စားနပ်ရိက္ခာ ဝယ်ယူနိုင်စွမ်းမရှိတော့တဲ့ အခြေအနေကိုရောက်ရှိနေတာပါ။
ဒေသအလိုက် ကုန်ဈေးနှုန်းမြင့်တက်မှုတွေမှာ မကွေးတိုင်းဒေသကြီးက ၃၈ ရာခိုင်နှုန်းနဲ့ အမြင့်ဆုံး ဖြစ်နေပြီး အဲဒီနောက်မှာ ကရင်ပြည်နယ်က ၃၂ ရာခိုင်နှုန်းနဲ့ ရခိုင်ပြည်နယ်က ၃၁ ရာခိုင်နှုန်းအထိမြင့်တက်နေတယ်လို့ သိရပါတယ်။
ပြည်တွင်းပဋိပက္ခတွေနဲ့ လောင်စာဆီပြတ်လပ်မှု အကျိုးဆက်တွေဟာ မြန်မာပြည်သူတွေရဲ့ နေ့စဉ်ဘဝ အခက်အခဲတွေကို ပိုမိုကြီးထွားလာစေတယ်လို့ WFP က ဆိုပါတယ်။
ဒီလိုအခြေအနေတွေကြောင့် ဝင်ငွေ၊ စုဆောင်းငွေနဲ့ အလုပ်အကိုင် အခွင့်အလမ်းနည်းပါးတဲ့ အခြေခံမိသားစုတွေဟာ စားနပ်ရိက္ခာပြတ်လပ်မှုအန္တရာယ်နဲ့ အဆိုးရွားဆုံးရင်ဆိုင်နေရတာကြောင့် လူသားချင်းစာနာမှုဆိုင်ရာအကူအညီတွေ ပိုမိုလိုအပ်နေတယ်လို့ဆိုပါတယ်။
