Border News Agency
မကွေး၊ မေ ၁၉။
မကွေးတိုင်း၊ သရက်ခရိုင်အမှတ် ၄ တပ်ရင်းမှာ တာဝန်ထမ်းဆောင်နေရင်း အာဏာသိမ်းစစ်တပ်ဆီ ပူးပေါင်းသွားသူ ၉ ဦးရဲ့ ကိုယ်ရေးအချက်အလက်တွေကို မေလ ၁၈ ရက်နေ့မှာ အမည်ပျက်စာရင်းအဖြစ် ထုတ်ပြန်လိုက်ပါတယ်။
သူတို့ဟာ ပြီးခဲ့တဲ့ဖေဖော်ဝါရီလနဲ့ ဧပြီလအတွင်း သူတို့တာဝန်ကျရာနေရာတွေကနေတဆင့် အာဏာသိမ်းစစ်တပ်နဲ့ ချိတ်ဆက်သွားကြတာဖြစ်ပါတယ်။
အဲဒီ ၉ ဦးဟာ မင်းတုန်းမြို့နယ်အတွင်းရှိ အာဏာသိမ်းစစ်တပ်၊ ရဲနဲ့ ပျူစောထီးအဖွဲ့တွေနဲ့ ချိတ်ဆက်ကာ ခရိုင်မြို့ဖြစ်တဲ့ သရက်မြို့အခြေစိုက် ခလရ ၄၄၊ ကပစ ၁၂ တို့ဆီ သွားရောက်ပူးပေါင်းခဲ့ကြတာလို့ ဆိုပါတယ်။
အာဏာသိမ်းစစ်တပ်ဆီ ပူးပေါင်းသွားသူ ၉ ဦးမှာ ကံမမြို့နယ်မှ ဖလက် (ခ) သက်ထွန်း၊ စစ်သွေး (ခ) သက်နိုင်ထွန်း၊ တာတီး (ခ) ငဖြိုး၊ သီဟ (ခ) ကျော်သီဟ၊ သရက်မြို့နယ်မှ ဝိုင်းလေး (ခ) ထွန်းနိုင်ဝင်း၊ လိုက်ဂါး (ခ) သက်ပိုင်စိုး၊ နွေဦး (ခ) ကောင်းခန့်ဟိန်း၊ မင်းတုန်းမြို့နယ်မှ တာနော် (ခ) ရှင်းသန့်မောင်နဲ့ မြတ်သူ (ခ) နိုင်ထက်ဝေ တို့ဖြစ်ကြပါတယ်။
အဲဒီပူးပေါင်းသွားသူအချို့ကို မန္တလေးဘက်သို့ ပို့ဆောင်ထားသလို အချို့မှာလည်း သရက်မြို့ရှိ အာဏာသိမ်းစစ်တပ်ဂိတ်တွေမှာ လုံခြုံရေးယူတာနဲ့ ရဲတပ်ဖွဲ့ထဲဝင်ရောက်ဖို့ပြင်ဆင်တာ စတဲ့ယန္တရားတွေမှာ ပြန်လည်တာဝန်ထမ်းဆောင်နေကြတယ်လို့ ဆိုပါတယ်။
ဒါ့အပြင်အာဏာသိမ်းစစ်တပ်ဆီရောက်သွားတဲ့ အဲဒီ ၉ ဦးဟာ သရက်ခရိုင်အမှတ် ၄ တပ်ရင်းမှာ ကျန်ရှိနေတဲ့ အခြားသောတော်လှန်ရေးရဲဘော်တွေကိုလည်း စစ်တပ်နဲ့လာရောက်ပူးပေါင်းဖို့ဖုန်းဆက်ကာ လိုက်လံစည်းရုံးသိမ်းသွင်းမှုတွေရှိနေတယ်လို့လည်း ဆိုပါတယ်။
