Border News Agency
အမေရိကန်၊ မေ ၂၆။
အမေရိကန်သမ္မတဒေါ်နယ်ထရန့်က အီရန်နဲ့ ငြိမ်းချမ်းရေးသဘောတူညီချက်ရဖို့ အလောတကြီးမလုပ်ကြဖို့ ညွှန်ကြားလိုက်တာကြောင့် စစ်ပွဲအဆုံးသတ်တော့မယ့် မျှော်လင့်ချက်တွေဝေဝါးသွားပြီး စိုးရိမ်ပူပန်မှုတွေ တကျော့ပြန်မြင့်တက်လာပါတယ်။
အမေရိကန်နဲ့ အစ္စရေးတို့ပူးပေါင်းပြီး အီရန်အပေါ် ဆင်နွှဲနေတဲ့စစ်ပွဲဟာ ဒီကနေ့မှာတော့ ၈၇ ရက်မြောက်နေ့ထဲကို ချဉ်းနင်းဝင်ရောက်လာခဲ့ပြီ ဖြစ်ပါတယ်။
သမ္မတထရန့်က သဘောတူညီချက်ကို အတည်ပြုလက်မှတ်မထိုးနိုင်သေးသရွေ့ ဟော်မုဇ်ရေလက်ကြားကပိတ်ဆို့မှုတွေကို အပြည့်အဝ ဆက်လုပ်သွားမယ်လို့ ပြောထားသလို အီရန်ဘက်ကလည်းအေးခဲထားတဲ့ သူတို့ရဲ့ရန်ပုံငွေတွေ ပြန်ထုတ်ပေးရေးအပါအဝင် အဓိကအချက်တွေကို အမေရိကန်က ဆက်လက်ပိတ်ဆို့ထားဆဲဖြစ်တယ်လို့ ထုတ်ပြန်ထားပါတယ်။
အမေရိကန်နိုင်ငံခြားရေးဝန်ကြီး မာကိုရူဘီယိုကလည်း သဘောတူညီချက်ပျက်ပြားသွားရင် အခြားနည်းလမ်းနဲ့ ဖြေရှင်းရလိမ့်မယ်လို့ သတိပေးထားပါတယ်။
စစ်ပွဲကြောင့် ရေနံစိမ်းဈေးနှုန်းတွေမြင့်တက်လာမှုကြောင့် အိန္ဒိယနိုင်ငံမှာ မေလအတွင်း ၄ ကြိမ်မြောက်အဖြစ် စက်သုံးဆီဈေးနှုန်းတွေကို ထပ်မံမြှင့်တင်လိုက်ပါတယ်။
တပြိုင်တည်းမှာပဲ ငြိမ်းချမ်းရေးရနိုင်မယ့် မျှော်လင့်ချက်တွေကြောင့် ဂျပန်နိုင်ငံရဲ့ Nikkei စတော့အညွှန်းကိန်းဟာ သမိုင်းတလျှောက် ပထမဆုံးအကြိမ်အဖြစ် ၆၅,၀၀၀ အမှတ်အထက်ကို စံချိန်တင်မြင့်တက်ခဲ့ပါတယ်။
အပစ်အခတ်ရပ်စဲရေး လုပ်ဆောင်ထားပေမယ့် အစ္စရေးစစ်တပ်ဟာ လက်ဘနွန်တောင်ပိုင်းကမြို့အချို့ကို လေကြောင်းကနေဆက်လက်တိုက်ခိုက်နေတာကြောင့် နေအိမ်တွေပျက်စီးခဲ့ပါတယ်။
လက်ဘနွန်တောင်ပိုင်းတိုက်ပွဲအတွင်း အစ္စရေးစစ်သားတဦး သေဆုံးပြီး တဦး ပြင်းထန်စွာဒဏ်ရာရရှိခဲ့တာကို အစ္စရေးစစ်တပ်က အတည်ပြုထားသလို ဘေရွတ်မြို့တော်ရဲ့ ကောင်းကင်ယံမှာလည်း အစ္စရေးဒရုန်းတွေ ဝဲပျံနေဆဲဖြစ်ပါတယ်။
