Border News Agency
အမေရိကန်၊ မေ ၂၆။
အမေရိကန်နဲ့အီရန်ကြား ငြိမ်းချမ်းရေးစာချုပ်ချုပ်ဆိုဖို့ ကာတာနိုင်ငံမှာ အီရန်ထိပ်သီးကိုယ်စားလှယ်တွေ ဆွေးနွေးနေကြတုန်း အမေရိကန်စစ်တပ်က တောင်ပိုင်းအီရန်နိုင်ငံထဲရှိပစ်မှတ်အချို့ကို လေကြောင်းတိုက်ခိုက်ခဲ့ပါတယ်။
အမေရိကန်ဗဟိုစစ်ဌာနချုပ်ကတော့ အခုတိုက်ခိုက်မှုဟာအီရန်တပ်ဖွဲ့တွေရဲ့ ရန်ပြုမှုကနေ အမေရိကန်စစ်သည်တွေကိုကာကွယ်ဖို့အတွက် ကိုယ်ပိုင်ခုခံပိုင်ခွင့်အရတိုက်ခိုက်ခဲ့တာဖြစ်ပြီး ဒုံးကျည်ပစ်လွှတ်တဲ့နေရာတွေနဲ့ မိုင်းထောင်ဖို့လုပ်နေတဲ့ အီရန်လှေတွေကို ပစ်မှတ်ထားခဲ့တာလို့ဆိုပါတယ်။
အီရန်ဘက်ကလည်း အမေရိကန်ကမတိုက်ခိုက်ခင်မှာ အီရန်တော်လှန်ရေးအစောင့်တပ်ဖွဲ့ (IRGC) က ပင်လယ်ပြင်ထဲကသင်္ဘောတစီးကို အရင်ပစ်မှတ်ထားခဲ့တာလို့ဆိုထားပြီး အမေရိကန်ရဲ့တိုက်ခိုက်မှုကြောင့် အီရန်စစ်ဘက်ဆိုင်ရာပုဂ္ဂိုလ်အချို့ သေဆုံးခဲ့ရပါတယ်။
ပြီးခဲ့တဲ့ဧပြီလ ၈ ရက်နေ့ကတည်းက နှစ်ဖက်အပစ်အခတ်ရပ်စဲရေး တရားဝင်လုပ်ထားပေမယ့် အခုလိုထပ်မံတိုက်ခိုက်မှုတွေကြောင့် အမေရိကန်သမ္မတဒေါ်နယ်ထရန့် အသည်းအသန်လိုလားနေတဲ့ အမေရိကန် – အစ္စရေးနဲ့ အီရန်စစ်ပွဲအဆုံးသတ်ရေး ငြိမ်းချမ်းရေးဆွေးနွေးပွဲတွေကို ထိခိုက်ပျက်ပြားသွားစေနိုင်တယ်လို့ သတင်းတွေကသုံးသပ်နေကြပါတယ်။
အဲဒီအီရန်နိုင်ငံခြားရေးဝန်ကြီးအပါအဝင် ထိပ်သီးအဖွဲ့ဟာဒိုဟာမြို့ကို ရောက်ရှိနေပြီး အမေရိကန်သမ္မတထရန့်ကတော့ စာချုပ်ချုပ်ဖြစ်ရင် အားလုံးအတွက်ကောင်းမွန်တဲ့ စာချုပ်မျိုးပဲဖြစ်ရမယ်၊ မဟုတ်ရင်တော့ စစ်ပွဲဆီပြန်သွားရလိမ့်မယ်လို့ သတိပေးထားပါတယ်။
