Border News Agency
ထိုင်း၊ မေ ၂၆။
ထိုင်းနိုင်ငံ၊ ချွန်ဘူရီခရိုင်၊ ဖန်ထောင်မြို့နယ်ထဲက ဆောက်လုပ်ရေး အလုပ်သမားစခန်းတခုမှာ မေလ ၂၅ ရက်နေ့က မြန်မာရွှေ့ပြောင်းအလုပ်သမားတွေ ဝိုင်းဖွဲ့အရက်သောက်ရင်းရန်ဖြစ်ကြလို့ လူ ၂ ဦး ဓားနဲ့ခုတ်ခံရပြီး ဒဏ်ရာအပြင်းအထန်ရသွားခဲ့တယ်လို့ သိရပါတယ်။
အဲဒီဓားနဲ့အထိုးခံရသူတွေထဲက အသက် ၃၅ နှစ်အရွယ် ကိုလမင်းနေဟာ ရင်ဘတ်ညာဘက်အခြမ်းမှာ ဓားထိုးခံရပြီး သွေးထွက်လွန်နေသလို ကိုအောင်မင်းသန်းကတော့ ညာဘက်လက်ကောက်ဝတ်မှာ ဓားခုတ်ခံရလို့ လက်ကောက်ဝတ်ပြတ်လုနီးပါး ဖြစ်သွားခဲ့တာပါ။
အလုပ်သမားတွေအရက်မူးလာချိန်မှာ အဓိကတရားခံဖြစ်သူက ချေးထားတဲ့ငွေ ဘတ် ၂၅၀ ပြန်ဆပ်ဖို့တောင်းရာကနေ စကားများပြီး ရန်ပွဲဖြစ်ခဲ့တာလို့ စခန်းမန်နေဂျာကပြောထားကာ ဒဏ်ရာရသူတွေကိုတော့ ကယ်ဆယ်ရေးအဖွဲ့တွေက ဖန်ထောင်ဆေးရုံကို အရေးပေါ် ပို့ပေးထားပါတယ်။
အဲဒီဓားခုတ်တဲ့သူကတော့ ရုန်းရင်းဆန်ခတ်ဖြစ်နေတုန်း ထွက်ပြေးလွတ်မြောက်သွားခဲ့တယ်လို့ ဆိုပါတယ်။
အလုပ်သမား ၁,၀၀၀ ကျော်ရှိတဲ့ အဲဒီစခန်းထဲက မြန်မာအလုပ်သမားတွေဟာ ထိုင်းဘာသာစကားမပြောတတ်တာနဲ့ ကြောက်ရွံ့နေတာကြောင့် ရဲတပ်ဖွဲ့ကိုသတင်းအချက်အလက် မပေးရဲကြဘူးလို့လည်းဆိုပါတယ်။
လောလောဆယ်မှာတော့ ရဲတပ်ဖွဲ့က ဒဏ်ရာရထားတဲ့သူတွေကို စစ်ဆေးမေးမြန်းနေပြီး ထွက်ပြေးသွားတဲ့တရားခံကို ဖမ်းဆီးနိုင်ဖို့အတွက်လိုက်လံရှာဖွေနေတယ်လို့ ဆိုပါတယ်။
