Border News Agency
အစ္စရေး၊ မေ ၂၅။
အစ္စရေးစစ်တပ်က လက်ဘနွန်တောင်ပိုင်းရှိ ကျေးရွာတွေနဲ့မြို့တွေကို လေကြောင်းကနေတိုက်ခိုက်ခဲ့တာကြောင့် အနည်းဆုံး လူ ၃ ဦး သေဆုံးသွားခဲ့ပြီး ဒေသခံတွေကိုနေရပ်စွန့်ခွာသွားကြဖို့ အဓမ္မအမိန့်ထပ်မံထုတ်ပြန်လိုက်တယ်လို့ လက်ဘနွန်အမျိုးသားသတင်းအေဂျင်စီ (NNA) ရဲ့ ဖော်ပြချက်အရ သိရပါတယ်။
အဲဒီနာဘာတီးယားဒေသတွင်း မေလ ၂၅ ရက်၊ မနေ့ကလမ်းမကြီးတွေပေါ်မှာ မောင်းနှင်နေတဲ့မော်တော်ယာဉ် ၃ စီးကို အစ္စရေးဒရုန်းတွေနဲ့ပစ်မှတ်ထားတိုက်ခိုက်ခဲ့တာကြောင့် လူ ၃ ဦး သေဆုံးခဲ့ရတာဖြစ်ပါတယ်။
အဲဒီတိုက်ခိုက်မှုတွေအပြီးမှာတော့ အစ္စရေးစစ်တပ်က လက်ဘနွန်တောင်ပိုင်းရှိကျေးရွာပေါင်း ၁၀ ရွာက ဒေသခံပြည်သူတွေကို သူတို့ရဲ့ နေအိမ်တွေကနေ ချက်ချင်းဖယ်ရှားပေးကြဖို့ အမိန့်ထုတ်ခဲ့ပါတယ်။
အစ္စရေးစစ်တပ် ပြောရေးဆိုခွင့်ရှိသူက ဟစ်ဇ်ဘိုလာအဖွဲ့အနေနဲ့ အပစ်အခတ်ရပ်စဲရေး သဘောတူညီချက်ကို ချိုးဖောက်ခဲ့တာကြောင့် အခုလို အင်အားသုံးတိုက်ခိုက်ရတာဖြစ်တယ်လို့ လူမှုကွန်ရက်ကတဆင့် ပြောကြားထားပါတယ်။
အမေရိကန်ရဲ့ ကြားဝင်စေ့စပ်ပေးမှုနဲ့ ပြီးခဲ့တဲ့ဧပြီလ ၁၇ ရက်နေ့ကတည်းက အပစ်အခတ်ရပ်စဲရေးလုပ်ဆောင်ထားခဲ့ပေမဲ့ လက်ဘနွန်တောင်ပိုင်းနဲ့ဘေရွတ်မြို့တော်တို့မှာတော့ အစ္စရေးရဲ့ စစ်ဆင်ရေးတွေ ဆက်လက်ရှိနေဆဲဖြစ်ပါတယ်။
အစ္စရေးနဲ့ ဟစ်ဇ်ဘိုလာအဖွဲ့ကြား မတ်လ ၂ ရက်နေ့ကတည်းကတိုက်ပွဲတွေ ပြန်လည်ပြင်းထန်လာခဲ့တာကြောင့် လက်ရှိအချိန်အထိ သေဆုံးသူပေါင်း ၃,၀၀၀ ကျော်ရှိလာပြီလို့ လက်ဘနွန်ကျန်းမာရေးဝန်ကြီးဌာနက ထုတ်ပြန်ထားပါတယ်။
လက်ဘနွန်သမ္မတဂျိုးဇက်အောင်ကတော့ လက်ဘနွန်ပိုင်နက်ထဲကနေ အစ္စရေးတပ်ဖွဲ့တွေ ပြန်လည်ဆုတ်ခွာပေးရေးဟာ ဆွေးနွေးညှိနှိုင်းလို့မရတဲ့ တောင်းဆိုချက်ဖြစ်ပြီး ဇွန်လအစောပိုင်းမှာ ပြုလုပ်မယ့်ငြိမ်းချမ်းရေးဆွေးနွေးပွဲတွေမှာ ဆက်လက်တောင်းဆိုသွားမယ်လို့ ပြောကြားထားပါတယ်။
