Border News Agency
အီရန်၊ မေ ၂၉။
အမေရိကန်နဲ့ အီရန်နိုင်ငံကြား စစ်ပြေငြိမ်းရေး သဘောတူညီချက်တခုရဖို့ အလွန်နီးစပ်နေပြီလို့ အမေရိကန်ဒုတိယသမ္မတ ဂျိမ်းစ်ဒေးဗစ်ဗန့်စ်က ပြောကြားလိုက်ပါတယ်။
အီရန်တောင်ပိုင်းကို အမေရိကန်က လေကြောင်းတိုက်ခိုက်မှုပြုလုပ်ခဲ့ပြီး ကူဝိတ်မှာရှိတဲ့ အမေရိကန်စစ်စခန်းကိုအီရန်ဘက်က ဒရုန်း၊ဒုံးကျည်တွေနဲ့ ပြန်လည်လက်တုံ့ပြန်ခဲ့တဲ့ဖြစ်စဉ်တွေအပြီး နာရီပိုင်းအကြာ မေလ ၂၈ ရက် ညပိုင်းမှာ ဒုသမ္မတက အခုလိုထုတ်ဖော်ပြောဆိုခဲ့တာပါ။
နှစ်ဖက်အကြား စစ်ရေးအရ ထိတွေ့တိုက်ခိုက်မှုတွေရှိခဲ့ပေမယ့်လည်း ပြီးခဲ့တဲ့ဧပြီလ ၈ ရက်နေ့ကတည်းက ရယူထားတဲ့ယာယီအပစ်အခတ်ရပ်စဲရေးကိုတော့ ဆက်လက်ထိန်းသိမ်းထားဆဲဖြစ်ပါတယ်။
လက်ရှိမှာနှစ်နိုင်ငံကိုယ်စားလှယ်အဖွဲ့တွေဟာ ညှိနှိုင်းမှုအဆိုပြုချက်တွေကို အပြန်အလှန်ပေးပို့နေကြပြီး သဘောတူညီချက်အဆင့်အထိ မရောက်သေးပေမယ့် အပြုသဘောဆောင်တဲ့ အားထုတ်မှုတွေကို အရှိန်မြှင့်လုပ်ဆောင်နေတယ်လို့ အိမ်ဖြူတော်ဘက်ကဆိုပါတယ်။
ဒါပေမယ့် အီရန်နိုင်ငံပိုင် Tasnim သတင်းဌာနကတော့ ငြိမ်းချမ်းရေးဆွေးနွေးမှုတွေဟာ အပြီးမသတ်နိုင်သေးသလိုသဘောတူညီချက်တွေကိုလည်း အတည်မပြုနိုင်သေးကြောင်း ဆန့်ကျင်ကွဲပြားစွာ ဖော်ပြထားပါတယ်။
အမေရိကန်အစိုးရက အီရန်အနေနဲ့ နျူကလီးယားလက်နက်ထုတ်လုပ်နိုင်တဲ့ ယူရေနီယမ်သန့်စင်မှုလုပ်ငန်းတွေကို အပြီးတိုင်ရပ်ဆိုင်းဖို့နဲ့သန့်စင်ပြီးသား ယူရေနီယမ်တွေကိုစွန့်လွှတ်ဖို့ ဖိအားပေးတောင်းဆိုထားတာပါ။
အဲဒီအပြင်ဝါရှင်တန်ဒီစီမှာ သတင်းထောက်တွေနဲ့တွေ့ဆုံစဉ် ဒုသမ္မတဗန့်စ်က အီရန်ဘက်ကလည်း ဆွေးနွေးမှုတွေကိုယုံကြည်မှုရှိရှိ ထက်ထက်သန်သန်လုပ်ဆောင်နေတယ်လို့ အကောင်းမြင်ကြောင်းပြောဆိုခဲ့ပါတယ်။
သမ္မတဒေါ်နယ်ထရမ့်အစိုးရဟာ အများပြည်သူထောက်ခံမှုမရတဲ့ အီရန်စစ်ပွဲကိုစတင်ခဲ့ပြီးနောက် အဆုံးသတ်ဖို့ရုန်းကန်နေရတာကြောင့် အာရပ်မဟာမိတ်နိုင်ငံတွေ၊ ဒီမိုကရက်တစ်အတိုက်အခံတွေနဲ့ မိမိပါတီတွင်းက နိုင်ငံရေးသမားတွေရဲ့ ဖိအားပေးတောင်းဆိုမှုတွေကို ရင်ဆိုင်နေရပါတယ်။
အဲဒီဆွေးနွေးပွဲတွေရဲ့ တိကျတဲ့အချက်အလက်တွေကို တရားဝင်ထုတ်ပြန်ခြင်းမရှိသေးပေမဲ့ အီရန်က ပိတ်ဆို့ထားတဲ့ ဟော်မုဇ်ရေလက်ကြားကို ပြန်ဖွင့်ပေးဖို့၊ အဲဒီမှာထောင်ထားတဲ့ ရေမြှုပ်မိုင်းတွေရှင်းလင်းဖို့နဲ့ အီရန်ရဲ့ သန့်စင်ပြီးယူရေနီယမ်တွေကို အမေရိကန်ထံ လွှဲပြောင်းပေးအပ်ဖို့ စတဲ့အချက်တွေပါဝင်နိုင်တယ်လို့ ယူဆရပါတယ်။
