Border News Agency
လယ်ဒို၊ မေ ၂၉။
လယ်ဒိုမြို့နယ်မှာ အာဏာသိမ်းစစ်တပ် လက်နက်ကြီးပစ်ခတ်လို့ အရပ်သားသုံးဦးဒဏ်ရာရသွားတယ်လို့ ကရင်အမျိုးသားအစည်းအရုံးမှ မေလ ၂၉ရက်၊ ဒီနေ့ထုတ်ပြန်ပါတယ်။
အဲဒီလယ်ဒိုမြို့နယ်၊ ကျွန်းကြီးကျေးရွာကို မေလ ၂၆ ရက်၊ နေ့လည်ပိုင်းမှာ အာဏာသိမ်းစစ်တပ် ခလရ – ၂၆၄ တပ်ရင်းမှ ၁၅၅ မမ ဟောင်ဝှစ်ဇာလက်နက်ကြီးနှစ်လုံး ရည်ရွယ်ချက်ရှိရှိပစ်ခတ်တိုက်ခိုက်ခဲ့တာလို့ ဆိုပါတယ်။
အဲဒီလိုတိုက်ခိုက်ခဲ့တာကြောင့် ကျွန်းကြီးကျေးရွာနေ အသက်ငါးဆယ်နှစ်နှစ်အရွယ် စောနေကော်ထူး၊ အသက်ခြောက်ဆယ်တနှစ်အရွယ် စောစိန်ဝင်းနဲ့ အသက်သုံးဆယ်ခြောက်နှစ်အရွယ် နော်အယ်လွဲ ဒဏ်ရာရသွားခဲ့တယ်လို့ဆိုပါတယ်။
အဲဒီအပြင်ကျွန်းကြီးကျေးရွာမှ စောစိန်ဝင်း၊ ဦးလွမ်းမိုးအောင်နဲ့ ဦးစိန်ကြီးတို့ရဲ့ နေအိမ်သုံးလုံးလည်းပျက်စီးခဲ့တယ်လို့ ဆိုပါတယ်။
အဲဒီလယ်ဒိုမြို့နယ်အတွင်းကို အာဏာသိမ်းစစ်တပ်မှအင်အားအလုံးအရင်းနဲ့ စစ်ကြောင်းထိုးနေပြီး လက်နက်ကြီး၊ ဒရုန်း၊ လေယာဥ်တွေနဲ့ နေ့တိုင်းလိုလို အရပ်သားပြည်သူတွေကို ပစ်မှတ်ထားတိုက်ခိုက်နေတာကြောင့် ပြည်သူတွေအနေနဲ့ စိုးရိမ်ကြောက်ရွံ့မှုတွေနဲ့အသက်ရှင်နေထိုင်နေကြရတယ်လို့ ဆိုပါတယ်။
