Border News Agency
မင်းပြား၊ မေ ၂၉။
အာရက္ခတပ်တော်(AA) မင်းပြားမြို့နယ်မှာ သဘာဝပတ်ဝန်းကျင်စီမံခန့်ခွဲရေးဌာနမှဦးဆောင်ပြီး ဗျူးခြေထောက်ပင်ထောင်ချီစိုက်ပျိုးနေပါတယ်။
အဲဒီဗျူးခြေထောက်ပင်စိုက်ပျိုးတာဟာ သဘာဝပတ်ဝန်းကျင်ထိန်းသိမ်းကာကွယ်ရေးနဲ့ ရာသီဥတုပြောင်းလဲမှုကို ရင်ဆိုင်နိုင်ရေးအတွက်ပါ။
အဲဒီမင်းပြားခရိုင်အတွင်း ဒီရေတောပျက်စီးမှုကြုံတွေ့နေရတဲ့ ကမ်းစပ်ဒေသတွေနဲ့ သဘာဝဘေးအန္တရာယ်ကာကွယ်ရေးအတွက် အရေးပါတဲ့နေရာတွေကိုရွေးချယ်ကာ ဗျူးခြေထောက်အပင်ပေါင်း ၇၂၆၀ ပင်ကို စိုက်ပျိုးခဲ့တယ်လို့ဆိုပါတယ်။
ပြီးခဲ့တဲ့ ၂၀၂၃ ခုနှစ်၊ မေလမှာတိုက်ခတ်ခဲ့တဲ့ မိုခါဆိုင်ကလုန်းမုန်တိုင်းကြောင့်လည်း အာရက္ခဒေသမှာ ဒီရေတောပြုန်းတီးမှုတွေ အများအပြားဖြစ်ပေါခဲ့ပါတယ်။
သဘာဝဘေးတွေကိုကာကွယ်ဖို့နဲ့ ဒီရေတောတွေကိုပြန်လည်မွန်းမံဖို့အတွက် အာရက္ခပြည်သူ့တော်လှန်ရေးအစိုးရရဲ့ မြို့နယ်အလိုက်သစ်တောတာဝန်ရှိသူတွေမှ အာရက္ခဒေသရှိကမ်းရိုးတန်းမြို့နယ်တွေမှာ ဒီရေတောပင်တွေကို စနစ်တကျစိုက်ပျိုးနေတာလို့ဆိုပါတယ်။
သစ်ပင်စိုက်ပျိုးတာကို သစ်တောနဲ့ သဘာဝပတ်ဝန်းကျင်စီမံခန့်ခွဲရေးဌာနမှ ဦးဆောင်ပြီး မြို့နယ်ပါတီရုံး၊ ဒီလပ်ဌာန၊ အုပ်ချုပ်ရေးဌာန၊ အမျိုးသမီးအင်အားစု၊ လူငယ်အင်အားစုတွေနဲ့ ဒေသခံပြည်သူတွေ စုပေါင်းစိုက်ပျိုးခဲ့ကြပါတယ်။
