Border News Agency
မြောက်ဦး၊သြဂုတ် ၂၈။
အာရက္ခတပ်တော်(AA)ထိန်းချုပ်ထားတဲ့ မြောက်ဦးမြို့နယ်၊ပေါင်းတုတ်ကျေးရွာမှမြေယာတွေကို ၁၈၉၄ခုနှစ်၊ မြေသိမ်းဥပဒေအတိုင်းသိမ်းမယ်လို့ ULA/AAက တရားဝင်ထုတ်ပြန်ထားပေမယ့် ၁၈ ၉၄ ခုနှစ်၊ မြေသိမ်းအက်ဥပဒေအတိုင်းမဆောင်ရွက်ဘဲ ULA/AA ဟာ ဥပဒေပါပြဋ္ဌာန်းချက်တွေကို ချိုးဖောက်နေပါတယ်။
အဲဒီမြေကိစ္စနဲ့ပတ်သက်ပြီး ၁၈၉၄ ခုနှစ်မြေသိမ်းဥပဒေအတိုင်းကိုင်တွယ်နေတယ်လို့ ULA/AA က ဆိုထားပါတယ်။
ဒါပေမယ့် ဥပဒေအတိုင်းလုပ်ငန်းစဥ်တွေကို အဆင့်လိုက်မဖြတ်သန်းဘဲ မြေတိုင်းတာမှုကြေညာချိန်ကပင် လျှော်ကြေးကိစ္စကိုအဆင့်ကျော်ကာ တဧကသိန်းရှစ်ဆယ်နဲ့ လက်ဦးမှုယူသတ်မှတ်ခဲ့ပါတယ်။
အဲဒါကြောင့်ကာလပေါက်စျေးထက်အဆပေါင်းများစွာနည်းနေတာမို့ မြေပိုင်ရှင်တွေကတော့ တဧကသိန်းရှစ်ဆယ်ဟာလျော်ကြေးကို လက်မခံခဲ့ကြပါဘူး။
အဲဒီ ၁၈၉၄ ခုနှစ်မြေသိမ်းဥပဒေမှာ ဆောင်ရွက်ရမယ့်လုပ်ငန်းစဉ်အဆင့်တွေရှိပြီး မြေတိုင်း၊ကန့်ကွက်လွှာခေါ်၊စိစစ်၊မြေသိမ်းအမိန့်ထုတ်၊လျှော်ကြေးလို့ခေါ်တဲ့ အဆင့်တွေကိုဖြတ်သန်းရပါတယ်။
အဲဒီ၁၈၉၄ ခုနှစ်၊မြေသိမ်းဥပဒေအရ လျော်ကြေးပေးတဲ့အခါ မြေရဲ့လက်ရှိကာလပေါက်စျေးတင်မကဘဲ(“ကာလ ပေါက်ဈေး+ဖြစ်ပေါ်လာမယ့်နစ်နာမှုအားလုံး+၁၅ ရာခိုင်နှုန်းနှစ်သိမ့်ကြေး”) ကို ပေါင်းစပ်ပြီး ကော်လိတ္တော်အရာရှိ (Collector)ခရိုင်အုပ်ချုပ်ရေးမှူးက ကွင်းဆင်းစစ်ဆေးဆုံးဖြတ်ပေးရတာဖြစ်ပါတယ်။
အဲဒီကော်လိတ္တော်ရဲ့ဆုံးဖြတ်ချက်ကို မြေသိမ်းခံရသူက မကျေနပ်ရင်ကော်လိတ္တော်ကိုယ်တိုင်က မြေသိမ်းခံရသူတွေကို တရားရုံးမှာမိမိရလိုတဲ့ လျော် ကြေးပမာဏအတွက် လျှောက်ထားခွင့်ရှိတယ်ဆိုတာကို အသိပေးရပါတယ်။
အဲဒီလိုအသိပေးပြီးနောက်မှာမြေသိမ်းခံရသူတွေက ကော်လိတ္တော်ကိုလျှော်ကြေးကိစ္စတရားရုံးကို လွှဲပေးဖို့လျှောက်လွှာတင်ရပါတယ်။
အဲဒီကော်လိတ္ထော်ကအမှုကို တရားရုံးလွှဲပေးပြီး သူကိုယ်တိုင် ဒါမှမဟုတ် သူ့ကိုယ်စားလှယ်ကိုလွတ်လို့ဖြစ်ဖြစ် အမှုရင်ဆိုင်ရပါတယ်။
အဲဒီမြောက်ဦးမြို့နယ်၊ပေါင်းတုတ်ကျေးရွာမြေသိမ်းကိစ္စမှာ ကော်လိတ္ထော်ဘက်ကသတ်မှတ်တဲ့လျှော်ကြေးကို မြေပိုင်ရှင်တွေက ကာလပေါက်စျေးထက် အဆမတန်နည်းပါးတာမို့လက်မခံကြဘူးလို့ တရားဝင်ကန့်ကွက်စာတင်အသိပေးထားပြီးသားဖြစ်ပါတယ်။
အဲဒါကြောင့် မြေပိုင်ရှင်တွေတရားရုံးမှာ လျှောက်ထားခွင့်ကို ကော်လိတ္ထော်ဘက်ကအကောင်အထည်ဖော်ပေးရမှာပါ။
အဲဒီလိုအကောင်အထည်မဖော်ဘဲ ကာလတန်ကြေးမပေးချင်လို့ သိမ်းဆည်းမယ့်မြေယာတွေကို ခြံတိုင်တွေလာစိုက်ပြီးလက်နက်ကိုင်လုံခြုံရေးတွေနဲ့အင်အားပြ ခြိမ်းခြောက်နေတာဟာ အာရက္ခပြည်သူ့တော်လှန်ရေးအစိုးရရဲ့ တရားဥပဒေစိုးမှုနဲ့ရက္ခိုင်အမျိုးသားအဖွဲ့ချုပ်(ULA)ရဲ့အဖွဲ့အစည်းခိုင်မာအား ကောင်းမှုကိုဆိုးဆိုးဝါဝါးထိခိုက်စေပါတယ်။
အဲဒီအပြင်မူလမြေပိုင်ရှင်တွေက မြေယာအတွင်းဝင်ရောက်သန့်ရှင်းရေးလုပ်နေတာတွေကို အလုပ်သမားတွေ၊ကားသမားရခိုင်လူမျိုး၊မြေပိုင်ရှင်မူဆလင်အပါအဝင်အရပ်သားတွေကို အာရက္ခတပ်တော်(AA)စစ်သားတွေ အတင်းအဓမ္မဖမ်းဆီးတာတွေရှိနေတယ်လို့ ဒေသခံပြည်သူတွေက အတည်ပြုပြောကြပါတယ်။
ရက္ခိုင်အမျိုးသားအဖွဲ့ချုပ်(ULA)ရဲ့ ဗဟိုမြေယာစီမံခန့်ခွဲမှုကော်မတီအတွင်းရေးမှူးဦးကျော်ဇံက မြေသိမ်းမှုတွေနဲ့ပတ်သက်လို့ ၁၈၉၄ ခုနှစ်၊မြေသိမ်းဥပဒေကိုအခြေခံထားပြီး အသင့်တော်ဆုံးနည်းလမ်းတွေကို ရွေးချယ်ကျင့်သုံးနေတယ်လို့ ဆိုပါတယ်။
အဲဒါကြောင့် လက်ရှိအခြေအနေမှာ အဆိုးဘက်ကခံစားနေတာတွေဟာ အနာဂတ်မှာ မျိုးဆက်ပေါင်းများစွာအတွက် အကျိုးရှိမယ်ဆိုရင် တဒင်္ဂအနစ်ခံမှုအတွက် စွန့်လွတ်သင့်တယ်လို့ခံယူဖို့လိုတယ်ဆိုပြီး ဦးကျော်ဇံကပြည်သူလူထုကိုအနစ်နာခံခိုင်းပါတယ်။
အဲဒီက္ခိုင်အမျိုးသားအဖွဲ့ချုပ်(ULA)ရဲ့ ဗဟိုမြေယာစီမံခန့်ခွဲမှုကော်မတီအတွင်းရေးမှူးဦးကျော်ဇံ အင်တာဗျူးထွက်လာပြီးနောက်ပိုင်းမှာ ပေါင်းတုတ်ကျေးရွာကမြေတွေကို နောက်ထပ်ခြံတိုင်းတွေလာစိုက်အင်အားပြနေတာဖြစ်ပါတယ်။
အဲဒီအပြင် ၁၈၉၄ ခုနှစ်မြေသိမ်းအက်ဥပဒေအရနစ်နာမှုလျှော်ကြေးပေးရမယ့်ကာလပေါက်စျေးကို မပေးသေးဘဲမြေပိုင်ရှင်တွေကို ခြိမ်းခြောက်အကြပ်ကိုင်နေသလို မြေပုံမြို့နယ်ရှိပုစွန်တာဧကရာချီကိုလည်း အာရက္ခတပ်တော်(AA) တပ်မှူးချုပ်၊ဗိုလ်ချုပ်ထွန်းမြတ်နိုင်ရဲ့ဦးလေးတော်စပ်သူ၊တရားဥပဒေစိုးမိုးရေးနဲ့ပြည်သူ့လုံခြုံရေးဌာန(ဒီလပ်)ချုပ်ဦးအောင်သာဝင်းဦးဆောင်းပြီး အတင်းအဓမ္မသိမ်းယူကာ လက်နက်ကိုင်တပ်ဖွဲ့ဝင်တွေကို စခန်းချနေထိုင်ခိုင်းထားပါတယ်။
အဲဒီအာရက္ခတပ်တော်ထိန်းချုပ်နယ်မြေတွေမှာ ရက္ခိုင်အမျိုးသားအဖွဲ့ချုပ် (ULA)ရဲ့ ဗဟိုမြေယာစီမံခန့်ခွဲမှုကော်မတီကို ဗိုလ်မှူးချုပ်ကျော်ဟန်ကဥက္ကဋ္ဌ၊ဦးကျော်ဇံကအတွင်းရေးမှူးတာဝန်ယူထားကြပြီး ရခိုင်အမျိုးသားပါတီ(ANP) ရဲ့ပေါက်တောမြို့နယ်အမျိုးသားလွှတ်တော်ကိုယ်စားလှယ်ဟောင်းဦးတက်ထွန်းအောင်အပါအဝင် ဦးမောင်ဦးကျော်၊ဦးသာထွန်းရွှေနဲ့တခြားသူတွေဟာ ပေါ်မတီဝင်တွေအဖြစ်တာဝန်ယူ ဆောင်ရွက်နေကြပါတယ်။
နောက်ပြီးကျောက်တော်-မြောက်ဦးကားလမ်းဘေးရှိ ကျောက်တော်မြို့ နယ်မှပြည်သူပိုင်မြေယာတွေကို အာရက္ခတပ်တော်(AA)ထောက်လှမ်းရေးမှ ဗိုလ်မှူးကြီးမင်းခန့်နှုတ်မိန့်နဲ့မြေယာပိုင်တွေကို တရားဝင်အသိမပေးဘဲ ခြံခတ်သိမ်းယူထားတာတွေလည်းရှိနေတယ်လို့ မြေပိုင်ရှင်တွေက အတည်ပြုပြောကြပါတယ်။
အဲဒီအပြင် အာရက္ခတပ်တော်ထိန်းချုပ်နယ်မြေတွေမှာ ပြည်သူပိုင်မြေယာတွေကို မူလမြေပိုင်ရှင်တွေကို အသိပေးတာ၊ဆွေးနွေးတာ၊လျှော်ကြေးပေးတာမရှိဘဲ ULA/AA က အတင်းအဓမ္မမြေသိမ်းတာတွေရှိနေတယ်လို့ အာရက္ခပြည်သူတွေက ဆိုကြပါတယ်။
အဲဒီလိုအတင်းအဓမ္မမြေသိမ်းနေတာတွေဟာ ULA/AA ကိုယ်တိုင်ကျင့်သုံးနေတဲ့မြေသိမ်းဥပဒေနဲ့မညီသလို နိုင်ငံတကာမြေယာမူဝါဒတွေကို ချိုးဖောက်နေတာမို့ ULA/AA ဟာ နိုင်ငံတကာအကူအညီတွေ၊ထောက်ခံမှုတွေကျဆင်းလာပြီး အရေးယူဒဏ်ခတ်ပိတ်ဆို့မှုတွေခံရလာနိုင်တယ်လို့ နိုင်ငံတကာလူ့အခွင့်အရေးစောင့်ကြည့်လေ့လာနေကြသူတွေက သုံးသပ်ပြောဆိုကြပါတယ်။
အဲဒီအပြင် အပြည်ပြည်ဆိုင်ရာတရားရုံး(ICJ)က တားမြစ်မိန့်ချထားတဲ့မောင်တောဒေသက ရိုဟင်ဂျာကျေးရွာဟောင်းမြေနေရာတွေကို ULA/AA က စီမံပြုပြုင်အသုံးချနေတာဟာ နိုင်ငံတကာဥပဒေကိုချိုးဖောက်ပြီး လူမျိုးတုန်းသတ်ဖြတ်မှုသက်သေတွေကို ဖျက်ဆီးနေတာမို့ နိုင်ငံတကာဥပဒေအရရင်ဆိုင်အပြစ်ပေးခံရလာနိုင်တယ်လို့ ရိုဟင်ဂျာအရေးလှုပ်ရှားနေကြသူတွေက ဆိုကြပါတယ်။
အရင်အစိုးရအဆက်ဆက်ကမြေသိမ်းဒဏ်ကို ရခိုင်လူထုဟာ ခါးစည်းခံခဲ့ကြရသလို အာရက္ခပြည်သူ့တော်လှန်ရေးအစိုးရလက်ထက်မှာလည်း ဆက်ခံစားရမယ့်ကိန်းဆိုက်နေပြီလို့ အာရက္ခပြည်သူတွေကဆိုကြပါတယ်။
