Border News Agency
မကွေး၊မေ ၂၉။
မကွေးတိုင်း၊မင်းဘူးမြို့နယ်၊မင်းဘူး-အမ်း လမ်းပိုင်းပေါ်မှာ အာဏာသိမ်းစစ်တပ်ရဲ့ ထောက်ပို့ကားတစီးကို မေလ ၂၈ ရက်နေ့က မိုင်းဆွဲတိုက်ခိုက်ခဲ့တာကြောင့် ၆ ဦး သေဆုံးပြီး ၃ ဦး အရှင်ဖမ်းမိခဲ့တယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ထုတ်ပြန်ပါတယ်။
အဲဒီတိုက်ခိုက်မှုကို မင်းဘူးမြို့နယ် ပြည်သူ့ကာကွယ်ရေးအဖွဲ့ (ပကဖ)၊ CDF-Asho နဲ့ NSA လူ့ဘောင်သစ်တပ်မတော်တို့ ပူးပေါင်းပြီး လုပ်ဆောင်ခဲ့တာပါ။
အဲဒီလို မိုင်းဆွဲတိုက်ခိုက်ပြီးနောက် နှစ်ဖက်အကြား မိနစ် ၂၀ ကြာ ထိတွေ့ပစ်ခတ်မှု ဖြစ်ပွားခဲ့ပြီး အာဏာသိမ်းစစ်တပ်ဆီကနေလက်နက်ခဲယမ်းအများအပြားသိမ်းဆည်းရမိခဲ့တယ်လို့ ဆိုပါတယ်။
အဲဒီသိမ်းဆည်းရမိတဲ့ လက်နက်ခဲယမ်းတွေထဲမှာ အူဇီ ၃ လက်၊ MA-1 ၂ လက်၊ MA-2 ၁ လက်၊ ၅.၅၆ ကျည် လက်ဆွဲဘောက် ၁ လုံး၊ ၁၂၂ မမ MLRS ရော့ကတ် ပို့ယမ်းသေတ္တာ ၆ လုံးနဲ့ ၁၂၂ မမ MLRS ရော့ကတ် ၂၈ လုံး ပါဝင်ပါတယ်။
ဒီစစ်ဆင်ရေးဟာ အာဏာသိမ်းစစ်တပ် စိုးမိုးနယ်မြေအတွင်း စစ်တပ်နဲ့ အနီးကပ်ဆုံးနေရာမှာ လုပ်ဆောင်ခဲ့တာဖြစ်ပြီး ပြည်သူ့ကာကွယ်ရေးအဖွဲ့ (ပကဖ) နဲ့ ပူးပေါင်းတပ်ဖွဲ့တွေရဲ့ တိုက်ခိုက်ရေးစွမ်းရည်ကို ထင်ထင်ရှားရှား ပြသနိုင်ခဲ့တယ်လို့လည်းဆိုပါတယ်။
