Border News Agency
စစ်ကိုင်း၊ ဩဂုတ် ၂၉။
စစ်ကိုင်းတိုင်း၊ကလေးမြို့နယ်၊ချင်းတွင်းတံတားအနီးမှာ ဩဂုတ်လ ၂၃ ရက်နေ့က မော်တော်ယာဥ်တစီးဆီကနေကျပ် ၂ ဒသမ ၉၅ ဘီလီယံတန်ဖိုးရှိ စိတ်ကြွဆေးပြား ၁၁ ဒသမ ၈ သိန်းကိုဖမ်းဆီးရမိခဲ့တယ်လို့ မူးယစ်ဆေးဝါးတားဆီးကာကွယ်ရေး ဗဟိုအဖွဲ့က သြဂုတ်လ ၂၈ ရက်၊မနေ့ကထုတ်ပြန်ပါတယ်။
ဇမ်းလျန်းပုမ်းနဲ့ ဒိုးရှန်းမန်တို့ မောင်းနှင်လာတဲ့မော်တော်ယာဉ်ပေါ်မှ စိတ်ကြွဆေးပြား ၉ ဒသမ ၂ သိန်းကို စတင်ဖမ်းဆီးရမိခဲ့သလို တောင်ဖီလာရပ်ကွက်မှ မဇင်လမ်မာန်နဲ့ ချမ်းမြေ့အောင်စည်ရပ်ကွက်မှ ဟောက်ခန့်ခွာလ်ဆီမှ စိတ်ကြွဆေးပြား ၂ ဒသမ ၆ သိန်းကို ထပ်မံဖမ်းဆီးနိုင်ခဲ့တာပါ။
အဲဒီစိတ်ကြွဆေးပြားတွေကို ရှမ်းပြည်တောင်ပိုင်း၊နမ့်စန်မြို့မှ စစ်ကိုင်းတိုင်း၊တန့်ဆည်မြို့နယ်သို့ပို့ဆောင်ပြီး ကလေးမြို့သို့ ဆက်လက်သယ်ဆောင်ခိုင်းခဲ့တာလို့ဆိုပါတယ်။
အဲဒီဖမ်းဆီးရမိသူတွေကို မူးယစ်ဆေးဝါးနဲ့ စိတ်ကိုပြောင်းလဲစေတဲ့ဆေးဝါးဆိုင်ရာ ဥပဒေနဲ့အရေးယူထားပြီး ထွက်ပြေးလွတ်မြောက်နေသူ ပေါင်ရှင်းတွောင်နဲ့ကောင်းစံတို့ကို ဖမ်းဆီးနိုင်ဖို့ စုံစမ်းနေတယ်လို့ဆိုပါတယ်။
အဲဒီအပြင် မူးယစ်ဆေးဝါးရောင်းဝယ်ရာမှ ရလာတဲ့ငွေကြေးနဲ့ ပိုင်ဆိုင်မှုတွေကို ပြည်သူ့ဘဏ္ဍာအဖြစ်သိမ်းဆည်းနိုင်ရေးအတွက် ငွေကြေးခဝါချမှုတိုက်ဖျက်ရေးဥပဒေနဲ့ပါ ဆက်လက်အရေးယူသွားမယ်လို့ ဆိုပါတယ်။
