Border News Agency
နေပြည်တော်၊ ဩဂုတ် ၂၈။
ထိုင်း-မြန်မာ နှစ်နိုင်ငံကြားနယ်စပ်လုံခြုံရေးအပါအဝင် စစ်တပ်နှစ်ရပ်ကြား ပူးပေါင်းဆောင်ရွက်မှုတွေတိုးမြှင့်ဖို့ အာဏာသိမ်းစစ်တပ်ရဲ့ ကာကွယ်ရေးဦးစီးချုပ်ရဲဝင်းဦးနဲ့ ထိုင်းနိုင်ငံအမျိုးသားလုံခြုံရေးကောင်စီ အတွင်းရေးမှူးချုပ် Mr. Chatchai Bangchuad တို့ ဩဂုတ်လ ၂၇ ရက်နေ့က နေပြည်တော်မှာဆွေးနွေးခဲ့ပါတယ်။
အဲဒီဆွေးနွေးမှုမှာ နှစ်နိုင်ငံနယ်စပ်ဒေသ တည်ငြိမ်ရေး၊တရားဥပဒေစိုးမိုးရေးနဲ့ နယ်စပ် ကုန်သွယ်ရေးဆိုင်ရာကိစ္စတွေကို အဓိက ထည့်သွင်းဆွေးနွေးခဲ့ကြတာပါ။
အဲဒီအပြင် နယ်စပ်ဖြတ်ကျော်ဝင်ရောက်လာသူတွေပါဝင်ပတ်သက်နေတဲ့ အွန်လိုင်းလိမ်လည် လောင်းကစားမှုတွေကို နှစ်နိုင်ငံအစိုးရနဲ့ စစ်တပ်နှစ်ရပ်ကြား ပိုမိုတိုးမြှင့်တားဆီးနှိမ်နင်းသွားမယ့် အခြေအနေတွေကိုလည်း ဆွေးနွေးခဲ့ပါတယ်။
နောက်ပြီးလက်နက်ခဲယမ်း၊မူးယစ်ဆေးဝါးနဲ့ ထိန်းချုပ်ဓာတုပစ္စည်းတွေတရားမဝင် သယ်ဆောင် ရောင်းဝယ်တာကို ပူးပေါင်းတားဆီးဖို့နဲ့ သတင်းအချက်အလက်တွေကို အချိန်နဲ့တပြေးညီအပြန်အလှန်ဖလှယ်သွားဖို့ သဘောတူခဲ့ကြပါတယ်။
နယ်စပ်ဒေသနေ ပြည်သူတွေ ဘေးကင်းစွာနေထိုင်နိုင်ရေးအတွက် လုံခြုံရေးဆိုင်ရာကိစ္စတွေမှာ အပြည့်အဝပူးပေါင်းဆောင်ရွက်ရင်း နှစ်နိုင်ငံစစ်တပ်ကြား ရှိရင်းစွဲဆက်ဆံရေးကို ပိုမိုခိုင်မာအောင် ဆက်လက်ဆောင်ရွက်သွားမယ်လို့ဆိုပါတယ်။
