Border News Agency
ကျောက်တော်၊ အောက်တိုဘာ ၁၃။
အာဏာသိမ်းစစ်တပ်ဟာ နိုင်ငံတဝှမ်းရှိ ကလေးသူငယ်တွေအပေါ် လေကြောင်း၊ဒရုန်း၊လက်နက်ကြီးတွေနဲ့ပစ်ခတ်တိုက်ခိုက်တာတွေကို တိုးမြှင့်လုပ်ဆောင်နေတာကြောင့် ကလေးသူငယ်တွေအပေါ်ကျူးလွန်တဲ့ ရာဇဝတ်မှုတွေကို ထိရောက်စွာအရေးယူပေးဖို့ ကျော်မိုးထွန်းက တိုက်တွန်းပြောဆိုလိုက်ပါတယ်။
အမေရိကန်နိုင်ငံ၊နယူးယောက်မြို့မှာ အောက်တိုဘာလ ၁၂ ရက်နေ့ကကျင်းပခဲ့တဲ့ ကုလ
သမဂ္ဂအထွေထွေညီလာခံ၊တတိယကော်မတီအစည်းအဝေးမှာ ဦးကျော်မိုးထွန်းက ခုလို ပြောကြားခဲ့တာဖြစ်ပါတယ်။
စစ်တပ်ဟာအရပ်သားပြည်သူတွေရဲ့ နေအိမ်တွေ၊ ကျေးရွာတွေ၊ ဆေးရုံတွေ၊ စာသင်ကျောင်းတွေနဲ့ စစ်ဘေးရှောင်စခန်းတွေကိုပါ ရည်ရွယ်ချက်ရှိရှိပစ်မှတ်ထားတိုက်ခိုက်နေတာကြောင့် ကလေးငယ်များစွာ အသက်ဆုံးရှုံးနေရသလို မိသားစုတွေနဲ့ကွဲကွာကာ စာသင်ကြားခွင့်နဲ့ ကျန်းမာရေးစောင့်ရှောက်မှုတွေပါ ဆုံးရှုံးနေရတယ်လို့ ဆိုပါတယ်။
အဲဒီအပြင် မြန်မာနိုင်ငံမှာ ကလေးသူငယ်လေးသန်းခွဲကျော်ဟာ လူသားချင်းစာနာမှုအကူအညီတွေအရေးပေါ် လိုအပ်နေပေမယ့် အာဏာသိမ်းစစ်တပ်က အကူအညီပေးရေးလမ်းကြောင်းတွေကို ပိတ်ဆို့ထားတာကြောင့် ကလေးတသန်းခွဲကျော်မှာ ကာကွယ်ဆေးနဲ့ ကျန်းမာရေးဝန်ဆောင်မှုတွေ မရရှိကြဘဲ ဖြစ်နေရတယ်လို့လည်းဆိုပါတယ်။
အာဏာသိမ်းစစ်တပ်ရဲ့ လူမဆန်တဲ့လုပ်ရပ်တွေကြောင့် ဒေသတွင်းနဲ့ ကမ္ဘာလုံးဆိုင်ရာလုံခြုံရေးကိုပါ ခြိမ်းခြောက်နေတာဖြစ်ပြီး နိုင်ငံတကာအသိုင်းအဝိုင်းအနေနဲ့ အကာအကွယ်ပေးတာ၊ ရာဇဝတ်မှုတွေအတွက် အားပေးသလိုမလုပ်ကြဖို့နဲ့သူတို့ကိုတာဝန်ယူမှု၊တာဝန်ခံမှုရှိလာစေရေးထိရောက်တဲ့ အရေးယူဆောင်ရွက်မှုတွေ ပြုလုပ်ပေးဖို့ တောင်းဆိုထားပါတယ်။
#ဦးကျော်မိုးထွန်း #ကုလသမဂ္ဂ #ကလေးသူငယ်အခွင့်အရေး #အာဏာသိမ်းစစ်တပ် #BNA
