Border News Agency
ကရင်နီ၊မေ ၃၁။
ကရင်နီအမျိုးသားကာကွယ်ရေးတပ် (KNDF) ထူထောင်တဲ့ ၅နှစ်ပြည့်အထိမ်းအမှတ်အခမ်းအနားသို့ ရက္ခိုင့်အမျိုးသားအဖွဲ့ချုပ်/အာရက္ခတပ်တော် (ULA/AA) မှ မေလ ၃၁ ရက်၊ ဒီနေ့မှာ သဝဏ်လွှာပေးပို့ကာ ဂုဏ်ပြုလိုက်ပါတယ်။
အဲဒီဂုဏ်ပြုသဝဏ်လွှာထဲမှာ ပြီးခဲ့တဲ့ ၂၀၂၁ ခုနှစ် စစ်အာဏာသိမ်းပြီးနောက်ပိုင်း နိုင်ငံတကာနဲ့ ပြည်သူ့အာဏာတွေကိုလက်နက်အားကိုးနဲ့သိမ်းယူခဲ့တဲ့ အာဏာသိမ်းစစ်တပ်ကိုအမြစ်ဖြတ် တွန်းလှန်ဖို့အတွက် တနိုင်ငံလုံးက ရဲရင့်တဲ့လူငယ်တွေဟာ လက်နက်ကိုင်လမ်းစဉ်ကို ရွေးချယ်ခဲ့ကြတယ်လို့ဆိုပါတာ်။
အဲဒီ ၅ နှစ်ကျော်ကာလအတွင်း တော်လှန်ရေးအရှိန်ဟာ တဟုန်ထိုးရွေ့လျားနေပြီး အာဏာသိမ်းစစ်တပ်ထိန်းချုပ်ထားတဲ့ မြို့ကြီး၊ မြို့နယ်တွေကို သိမ်းပိုက်ထားနိုင်တဲ့ အဖွဲ့တွေလည်း ရှိလာပြီလို့ဆိုပါတယ်။
KNDF ဟာ ၅ နှစ်တာကာလအတွင်း ကရင်နီဒေသနဲ့ ရှမ်းမြောက်ဒေသအပါအဝင် နေရာအချို့မှာမိတ်ဖက်အဖွဲ့အစည်းတွေ၊ မဟာမိတ်အဖွဲ့အစည်းတွေနဲ့အတူ လက်တွဲတိုက်ပွဲဝင်ခဲ့ပြီး ကရင်နီဒေသတွင်းက မြို့ကြီး၊ မြို့ငယ်အချို့ကို သိမ်းပိုက်ရရှိထားကာ ကိုယ်ပိုင်အုပ်ချုပ်ရေးယန္တရားနဲ့ လည်ပတ်နိုင်ခဲ့ပြီ ဖြစ်ပါတယ်။
KNDF ရဲ့ ၅ နှစ်တာ တော်လှန်ရေးကာလအတွင်း အသက်၊ သွေး၊ ချွေးနဲ့ ဘဝပေါင်းများစွာ ပေးဆပ်စွန့်လွှတ်ခဲ့ကြတဲ့ ကရင်နီပြည်သူလူထု၊ ကရင်နီသူရဲကောင်းတွေနဲ့ တော်လှန်ရေးရဲဘော်တွေရဲ့ ပေးဆပ်မှုကို လေးနက်စွာ တန်ဖိုးထားအသိအမှတ်ပြုတယ်လို့လည်းဆိုပါတယ်။
အဲဒီအပြင် ကရင်နီပြည်သူလူထုတရပ်လုံးနဲ့ KNDF မှ မျှော်မှန်းထားတဲ့ စစ်ရေး၊ နိုင်ငံရေး ရည်မှန်းချက်တွေ အချိန်တိုအတွင်း အမြန်ဆုံး ပြည့်မြောက်နိုင်ပါစေကြောင်းလည်း ဆုမွန်ကောင်းတောင်းထားပါတယ်။
