Border News Agency
နယူးယောက်၊ စက်တင်ဘာ ၃၀။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့ကိုအာဏာသိမ်းစစ်တပ်က ပြင်းထန်စွာလေကြောင်းတိုက်ခိုက်ခဲ့တဲ့ အခြေအနေကိုနယူးယောက်မြို့ ကုလသမဂ္ဂဌာနချုပ်မှာကျင်းပတဲ့ အဆင့်မြင့်အစည်းအဝေးမှာ သံအမတ်ကြီးဦးကျော်မိုးထွန်းက ထုတ်ဖော်တင်ပြလိုက်ပါတယ်။
စက်တင်ဘာလ ၂၉ ရက်နေ့ကကျင်းပခဲ့တဲ့ အပြည်ပြည်ဆိုင်ရာနျူးကလီးယား လက်နက်အလုံးစုံဖျက်သိမ်းရေးနေ့အထိမ်းအမှတ်အစည်းအဝေးမှာ မိန့်ခွန်း ပြောကြားချိန် ကျောက်တော်မြို့မဈေးကို စစ်တပ်ရဲ့လေကြောင်းတိုက်ခိုက်မှုကြောင့် အမျိုးသမီးတွေနဲ့ကလေးငယ်တွေအပါအဝင် ငါးဆယ်ဦးထက်မနည်း သေဆုံးခဲ့ရတဲ့အကြောင်းကို ထည့်သွင်းပြောကြားခဲ့တာပါ။
အရပ်သားပြည်သူတွေရဲ့ အသက်အိုးအိမ်ကိုငဲ့ညှာတာမရှိတဲ့ အာဏာသိမ်းစစ်တပ်အနေနဲ့စစ်ဘက်၊အရပ်ဘက် နှစ်မျိုးသုံးပစ္စည်းတွေကို အပြုသဘောဆောင်တဲ့ရည်ရွယ်ချက်နဲ့ အသုံးပြုမယ်ဆိုတာဟာ မဖြစ်နိုင်ကြောင်းကိုလည်းထောက်ပြခဲ့ပါတယ်။
အဲဒီအပြင် အပြစ်မဲ့ပြည်သူတွေကို သတ်ဖြတ်နေတဲ့ စစ်တပ်နဲ့နျူးကလီးယားလက်နက်ပိုင်ဆိုင်တဲ့နိုင်ငံတို့အကြား နျူးကလီးယားဓာတ်အားပေးစက်ရုံဆိုင်ရာ ပူးပေါင်းဆောင်ရွက်နေမှုတွေပေါ် အလွန်အမင်းစိုးရိမ်ကြောင်းပြောဆိုခဲ့တာပါ။
မြန်မာနိုင်ငံမှာ စစ်အာဏာရှင်စနစ်ချုပ်ငြိမ်းပြီး စစ်တပ်ကိုအရပ်သားအုပ်ချုပ်မှုအောက် ပြန်လည်ထားရှိနိုင်တဲ့အချိန်ကျမှသာ နျူးကလီးယားစွမ်းအင်ဆိုင်ရာ နိုင်ငံတကာပူးပေါင်းဆောင်ရွက်မှုတွေကို ပြုလုပ်သင့်တယ်လို့ ပြောကြားခဲ့ပါတယ်။
အဲဒီအပြင်အာဏာသိမ်းစစ်တပ်ဆီသို့ စစ်လက်နက်ခဲယမ်းတွေ၊လေယာဉ်ဆီနဲ့စစ်ဘက်သုံးပစ္စည်းတွေစီးဝင်နေမှုကို ချက်ချင်းဖြတ်တောက်ပေးကြဖို့ ကုလသမဂ္ဂအဖွဲ့ဝင်နိုင်ငံတွေကိုတိုက်တွန်းတောင်းဆိုခဲ့ပါတယ်။
